Pak orë pas sulmit me armë ndaj televizionit Top Channel, policia dhe prokuroria duket se kanë arritur të mbledhin disa prova të vlefshme që mund të hedhin dritë mbi ngjarjen e rëndë.
Drejtori i Përgjithshëm i Policisë Muhamed Rrumbullaku ka zhvilluar ditën e sotme një mbledhje me strukturat ku janë analizuar të gjitha provat nga vendi i ngjarjes si dhe nga mjeti i braktisur nga autorët. Makina që u dogj pranë Golemit, në Kavajë, ndodhet në ambientet e Drejtorisë së Policisë, ku i është nënshtruar kqyrjes së imtësishme nga ekspertët.
Bëhet me dije se janë gjetur prova të vlefshme, të cilat janë përcjellë në laboratorin shkencor dhe pritet të nxjerrin profile ADN-je dhe shenja gishtash të cilat do të verifikohen nga databaza e policisë për të parë nëse mund të ketë një emër të cilit i përputhen.
Shumë persona janë shoqëruar gjatë këtyre orëve, përfshi edhe disa persona të ndaluar në Vlorë, të cilët janë shoqëruar në ambientet e policisë së Tiranës ku do iu bëhet ekzaminimi për të parë nëse kanë mbetje baruti në duar, çka ndodh pasi dikush qëllon me armë.
Policia është duke kqyrur edhe itinerarin e makinës përmes kamerave të shumta buzë rrugës. Makina tip “Range Rover” e cila nuk ishte regjistruar në Shqipëri dhe mbante targa të vjedhura, çuditërisht nga makina e një kameramani të Top Channel i cili ia kishte dhënë kushëririt dhe ky i fundit e kishte shitur, u gjet e djegur në vendin e quajtur “Përroin e Agait” me dy kallashnikovë brenda.