Ekspertë të Kombeve të Bashkuara kanë vizituar Izraelin nga 29 janari deri më 14 shkurt për të grumbulluar, analizuar dhe verifikuar të dhënat për dhunën seksuale të lidhur me sulmin e 7 tetorit.
Pas realizimit dhe grumbullimit të të dhënave, eksperti i Kombeve të Bashkuara raportoi se OKB ka arsye të forta për të besuar se ka pasur dhunë seksuale, përfshirë përdhunim në grup, në disa zona në Izrael gjatë sulmit të 7 tetorit nga militantët e Hamasit.
“Janë mbledhur gjithashtu edhe të dhëna të hollësishme dhe të besueshme, të cilat mund të jenë tregues i disa formave të dhunës seksuale, përfshirë gjymtimin gjenital, torturën, apo trajtimin mizor, çnjerëzor dhe përçmues”, - thuhet në raportin 24-faqësh të OKB-së.
Grupi radikal palestinez, Hamas i ka mohuar vazhdimisht akuzat për dhunë seksuale. Pjesëtarët e Hamasit e sulmuan Izraelin më 7 tetor 2023, ku vranë 1.200 njerëz dhe rrëmbyen 253 të tjerë, sipas autoriteteve izraelite. Ndërsa deri sot numri i viktimave e ka kaluar 30.000 palestinezë.
“Ekipi i misionit gjeti informata bindëse dhe të qarta se disa pengje që u dërguan në Gazë, ishin subjekt i formave të ndryshme të dhunës seksuale të ndërlidhur me konfliktin, dhe ka arsye të forta për të besuar se një dhunë e tillë mund të ketë qenë e vazhdueshme.”
Ky ekip tha se mund të nevojitet një hetim i plotë për ta vërtetuar madhësinë e përgjithshme, fushëveprimin dhe atributin specifik të dhunës seksuale.
Ekipi i OKB-së tha se ka marrë të dhëna edhe nga burimet institucionale dhe të shoqërisë civile, si dhe nga intervistat e drejtpërdrejta për “dhunën seksuale kundër grave dhe burrave palestinezë në qendrat e ndalimit, gjatë bastisjeve nëpër shtëpi dhe në pika të kontrollit”, pas 7 tetorit.
Sondazh
Lexo gjithashtu
