Sekretar për Organizimin Dixhital i Partisë Demokratike, njëherazi deputeti Endri Hasa ka reaguar pas Kuvendit të mbajtur nga ish-kryeministri Sali Berisha.
Me anë të një postimimi në rrjetet sociale Hasa shkruan se për herë të parë në historinë e demokratëve ndodh të dëgjosh një individ të kërcënojë me zë dhe figurë Shtetet e Bashkuara të Amerikës, duke iu referuar këtu deklaratës që bëri Berisha teksa sulmonte ambasadoren e SHBA, Yuri Kim.
Ndër të tjera ai shkruan se me 18 dhjetor, Partia Demokratike, demokratët shqiptarë do të lënë pas pjesët e hidhura të së shkuarës, bashkë me mbeturinat e komunizmit dhe të korrupsionit.
“Në vend të një urimi për PD!
Sot demokratët duhet të ndiheshin krenar për çdo gjë që i kanë dhënë Partisë Demokratike dhe gjithçka që kjo forcë i ka dhënë shqiptarëve. Por pas 31 vitesh, interesi i një individi të vetëm dominoi mbi qëllimet dhe pritshmëritë e demokratëve!
Një shfaqje që u prodhua me kosto të lartë, shtangu shqiptarët dhe demokratët që për herë të parë në historinë e tyre politike dëgjuan një individ të kërcënojë me zë dhe figurë Shtetet e Bashkuara të Amerikës!
Ky do të ishte fundi i familjes tonë politike miq, por kjo s’ka për të ndodhur!
Më 18 dhjetor, Partia Demokratike, demokratët shqiptarë do të lënë pas pjesët e hidhura të së shkuarës, bashkë me mbeturinat e komunizmit dhe të korrupsionit drejt ndryshimit që meriton çdo demokrat dhe çdo shqiptar 🇦🇱✌” shkruan Hasa ndër të tjera në postimin e tij.