Aeroporti i Bergenit në Norvegji pezulloi operacionet e fluturimit për dy orë e gjysmë pasi vendasit vunë re një dron në zonë. Aeroporti është i dyti më i madh në Norvegji dhe në një vit ai u shërben më shumë se 6 milionë pasagjerëve.
Po ashtu, Aeroporti i Bergenit ndodhet pranë bazës kryesore detare norvegjeze në Hoonsvern, një nga më të mëdhatë në Evropën veriore.
“Ne nuk e dimë nëse ka pasur ende drone, por jemi të sigurt se ka pasur të paktën një,” tha zëdhënësi i policisë. Përveç kësaj, një tjetër dron u pa në zonën e një aeroporti të vogël në Ferda dhe puna e tij u ndërpre gjithashtu për pak kohë.
Shfaqje të tjera të dronëve janë raportuar pranë platformave të naftës dhe gazit në det të hapur, si dhe pranë veprave të tjera infrastrukturore norvegjeze në muajt e fundit, tha Hedvig Moe, zëvendës shefi i Shërbimit të Sigurisë së Policisë Norvegjeze.
“Ne besojmë se (fluturimet me dron janë) kryer në një mënyrë që e bën të vështirë të zbulohet se kush qëndron në të vërtetë pas tij”, por autoritetet norvegjeze dyshojnë për përfshirjen ruse në operimin e mjeteve ajrore pa pilot që “mund të përdoren për spiunazh ose thjesht për të krijuar frikë, “tha Moe.
Të paktën shtatë shtetas rusë u arrestuan gjatë javëve të fundit për fluturimin e dronëve ose fotografimin e vendeve të ndjeshme në Norvegji. Operatori i aeroportit Avinor ka thënë se 50 vëzhgime të mundshme me dron janë raportuar në aeroportet civile të Norvegjisë deri më tani këtë vit, 27 prej tyre që nga korriku.
Ky është një rast i ngjashëm dhe me atë që u raportua në Shqipëri në muajin gusht. Dy shtetas rusë dhe një ukrainas u kapën në uzinën ushtarake të Gramshit duke tentuar të hyjnë me forcë në rrethimin e brendshëm. Një prej tyre sulmoi me spray ushtarakët shqiptarë që po bënin roje.
Mbi dy shtetas rusë, 33-vjeçarja Svetlana Timofoeva, 23-vjeçari Mikhail Zorin dhe ukrainasin Fiodor Mihailoviç rëndojnë 2 akuza; “Dhënia e informatave sekrete”, dhe “Goditja për shkak të detyrës”.
Tre shtetasve të huaj u janë sekuestruar dron dhe pajisje të tjera fotografike. Nga kqyrja e tyre, hetuesit thanë se kishin gjetur foto të shumta të bazave ushtarake të vendit, si dhe objekteve të tjera të infrastrukturës kritike, siç janë hidrocentralet.