Zyrtarët ukrainas kanë njoftuar se forcat ruse vazhdojnë të bombardojnë qytetin e Lysychansk dhe vendbanimet në jug e perëndim të qytetit, ndërsa përpiqen të ndërpresinnjë autostradë kryesore.
Serhiy Hayday, kreu i administratës ushtarake rajonale të Luhansk, tha sot se Lysychansk po sulmohej nga jugu dhe ishte dëmtuar rëndë.
Fshatrat në zonën përreth po bombardoheshin gjithashtu. Tre vendbanime në perëndim dhe jugperëndim të qytetit, afër autostradës për në Bakhmut, ishin nën zjarr.
"Rusët nuk ndalojnë së shkatërruari objektet banesore, industriale dhe administrative. Nuk ka orë kur artileria e armikut të qetësohet.Ata po përpiqen të bllokojnë qytetin nga jugu. Ne po mbrojmë Lysychansk”, tha Hayday.