Ambasada gjermane në Shqipëri ka bërë me dije se vendi ynë duke filluar që nga 16 janari do të futet sërish në listën e vendeve me rrezikshmëri të lartë për shkak të Covid-19.
Sipas ambasadës do të ndryshojnë dhe kushtet për hyrjen e shtetasve shqiptarë në Gjermani.
Para se të udhëtoni drejt Gjermanisë ju duhet të regjistroheni në faqen e internetit www.einreiseanmeldung.de.
Gjatë regjistrimit ju duhet të ngarkoni një dëshmi shërimi nga Covid-19 ose që jeni plotësisht të vaksinuar.
Nëse nuk mund të paraqisni asnjërën nga këto dy dëshmi, do t’ju duhet një test i Covid-19 për të hyrë në Gjermani.
Megjithatë pas mbërritjes do iu duhet të karantinoheni për 10 ditë.
Pas 5 ditësh, ju mund të testoheni përsëri dhe, nëse rezultati i testit është negativ, mund t’i jepni fund karantinës.