Një i ri ka shkuar për të vizituar kushëririn e tij që po vuan dënimin në Burgun e Fierit, por është arrestuar në flagrancë.
28 vjeçari Mehmet Dylgjeri ka tentuar të hyjë me lëndë narkotike në ambientet e burgut.
Siç njofton policia, nga ana e Sektorit për Hetimin e Narkotikëve dhe Trafiqeve në Drejtorinë Vendore të Policisë Fier, u bë arrestimi në flagrancë i shtetasit Mehmet Dylgjeri nga Elbasani.
Blutë saktësojnë se arrestimi i këtij shtetasi u bë pasi gjatë kontrollit në hyrje të takimeve me personat që vuajnë dënimin në IEVP Fier, iu gjetën dhe sekuestruan në cilësinë e provës materiale 4.65 gramë lëndë narkotike, e dyshuar kanabis sativa.
Gjatë marrjes në pyetje ai ka thënë se sasinë e dyshuar si lëndë narkotike, që iu gjet në xhep, e kishte për përdorim personal dhe se nuk kishte lidhje me akuzën që po i bëhej.
Materialet i kaluan Prokurorisë pranë Gjykatës së Shkallës së Parë Fier për veprat penale “prodhim dhe shitje e narkotikëve” dhe “futje ose mbajtje e sendeve të ndaluara në institucionet e ekzekutimeve të vendimeve me burgim”.