36 vjeçari Gazmir Harremi është arrestuar sot nga Policia e Elbasanit si i përfshirë në operacionin antidrogë ku u sekuestruan 4.2 kg heroinë dhe mbi 1 kg hashash.
Droga është kapur në një furgon që transportonte dru. Në pranga dje kanë rënë Gëzim Balla 46 vjeç, shofer i mjetit, banues në Elbasan, dhe disa persona të tjerë të lidhur me këtë ngjarje: Endri Karaj, Haziz Musai, Xhulio Musai dhe Danjel Xhelilaj.
Ndërkohë, sot Policia njofton se ka arrestuar pikërisht furnizuesin që siguronte drogën, Gazmir Harremin.
“Si rezultat i hetimeve, nga specialistët për Hetimin e Narkotikëve dhe Trafiqeve të Paligjshme në DVP Elbasan u arrestua në flagrancë shtetasi G.H 36 vjeç, banues në fshatin Hasmashaj, Peqin, pasi dyshohet se shtetasi G. B., i cili është arrestuar ditën e djeshme, e siguronte lëndën narkotike nga shtetasi G. H.
Vijojnë hetimet për identifikimin dhe kapjen e shtetasve të tjerë të përfshirë në këtë aktivitet kriminal. Materialet hetimore i kaluan Prokurorisë pranë Gjykatës së Shkallës së Parë Elbasan, për veprime të mëtejshme procedurale”, njofton Policia.
Lexo edhe: Operacioni anti-drogë në Elbasan, policia jep DETAJE