Kryeministri Edi Rama paralajmëroi sot rritjen e çmimit të energjisë elektrike gjatë verës, duke thënë se është një periudhë kur konsumi rritet ndjeshëm.
Pas deklaratës së Ramës, ka reaguar edhe deputetja demokrate Jorida Tabaku, e cila e quan ironike deklaratën e kreut të qeverisë, teksa thotë se nga vjet, çmimi i energjisë veç ka pësuar rënie.
“Kryeministi pasi kaloi lumin e zgjedhjeve lokale ndjehet i sigurtë për të kaluar rritjen e çmimit të energjisë për 95% të shqiptarëve. Ironike! Nga vjet çmimi energjisë veç ka rënë! Të gjithë flasin për diversifikim portofoli të energjisë, qeveria flet për rritje çmimi! Qeveria e pakicës”, shkruan Tabaku në një reagim në rrjetet sociale.
Gjatë fjalës së tij në Kuvend, kryeministri Rama tha se duhet të rinisë diskutimi për fashën e energjisë elektrike për konsumin gjatë verës.
“Ka rënë çmimi, por nuk është aty ku ka qenë. Qeveria ka pasur dhe ka vullnetin për të paguar, ndërkohë që me ardhjen e verës konsumi do të rritet ndjeshëm ndaj ne duhet të hapim diskutimin e fashës”, deklaroi Rama.