Gjatë fjalës së tij në konferencën e Ambasadorëve, kryeministri Edi Rama thelsoi edhe një herë rëndësinë e madhe që ka miratimi i Reformës në Drejtësi për të armdhen e vendit.
Rama u shpreh se dështimi i miratimit të Reformës do të ketë një kosto të pallogaritshme për Shqipërinë.
“Është e ditur botërisht se rruga që kemi bërë, pavarësisht rritjeve që mund të numërojmë dhe reformave që listojmë, kushtëzohet në drejtimin dhe shpejtësinë e miratimit të reformës në drejtësi. Një reformë me interes strategjik për shoqërinë tonë, e jo vetëm. Është vendi të thuhet se vështirë të gjendet në historinë e këtyre 25-vjetëve, një angazhim kaq të gjithanshëm të komuniteti ndërkombëtar.
Po ashtu ju jeni të parët që e keni vetëdijen e plotë nga kontakti i vazhdueshëm me të gjitha vendet partnere në këtë proces, për peshën e jashtëzakonshme që ka kjo reformë në raport me marrëdhëniet tona me BE-në, në raport me imazhin e besueshmërinë e Shqipërisë përballë ndërkombëtarëve.
Dua ta nënvizoj dhe përpara jush që jemi të vendosur që deri në momentin e fundit të bëjmë çdo përpjekje, në përputhje të plotë me qëllimin dhe qëndrimin e partnerëve tanë strategjik. Kjo është një reformë në një përmasë të 3-fishtë, së parë një përmasë të jashtëzakonshme për sa i përket shoqërisë, së dytë për sa i përket pozicionit dhe këndvështrimit prej të cilit do të perceptohemi nga partnerët tanë, në varësi të rezultatit dhe 3 në raport me vetë rajonin”, tha Rama.