Izraeli dhe Kosova kanë bërë një hap tjetër të rëndësishëm në marrëdhëniet midis dy vendeve. Ambasada e Izraelit në Prishtinë ka njoftuar se ditën e sotme do të mbahet ceremonia zyrtare për heqjen e vizave për shqiptarët e Kosovës që duan të udhëtojnë drejt këtij vendi.
Në njoftimin e publikuar thuhet se ceremonia e nënshkrimit të kësaj marrëveshjeje do të bëhet në orën 18:00 të mbasdites, e cila përkon edhe me Ditën e Pavarësisë së shtetit hebre.
“Kemi kënaqësinë t’ju ftojmë në pritjen e nesërme të organizuar nga Shkëlqesia e Saj znj. Tamar Ziv, Ambasadore e Shtetit të Izraelit në Republikën e Kosovës, me ç’rast do ta shënojmë Ditën e Pavarësisë së Izraelit dhe Marrëveshjen për Heqjen e Vizave për shtetasit kosovarë”,- thuhet në njoftimin e ambasadës së Izraelit në Prishtinë.
Presidentja Vjosa Osmani bëri të ditur më herët se Izraeli kishte njoftuar se do të hiqte vizat për qytetarët e Kosovës, dhe se ministritë përkatëse kishin nisur procedurat për formalizimin e marrëveshjes. Marrëveshja e nënshkruar i lejon qytetarët që të udhëtojnë të lirë në një nga destinacionet më të njohura turistike në rajon dhe më gjerë.
Kujtojmë se më 4 shtator të vitit 2020, Izraeli njohu zyrtarisht pavarësinë e Kosovës.
Sondazh
Lexo gjithashtu
