Një blegtor 57-vjeçar u gjet i pajetë në ujërat e vrullshme të një përroi në rajonin e Kontias, ishulli Limnos, ndërsa Greqia po përballet me mot të keq me reshje të dendura, stuhi dhe erëra të forta. Motit të ashpër i është dhënë emri "Bora", një sistem atmosferik që ka ardhur nga një front i ulët barometrik në Jon dhe po përparon ngadalë drejt lindjes. Kjo valë do të prekë shumë zona të vendit deri të hënën.
Limnosi është një nga rajonet më të goditura, ku përmbytjet nga përrenjtë kanë shkaktuar dëme të mëdha. Banorëve të fshatit Kontias u është dërguar mesazhi i emergjencës "112" për t'u evakuuar, pasi diga në zonë rrezikonte të tejmbushej.
Një tjetër viktimë është raportuar në ishull, një 70-vjeçar që humbi jetën pasi rrëshqiti dhe u godit në kokë ndërsa pastronte baltën në shkallët e shtëpisë.
Paralajmërime të reja janë dërguar edhe për banorët e Selanikut dhe Atikës, ku autoritetet presin stuhi të forta lokale në Athinë gjatë natës dhe mëngjesit të së dielës. Qytetarëve u është bërë thirrje të tregojnë kujdes dhe të ndjekin udhëzimet e autoriteteve.
Sipas Shërbimit Sinoptik Kombëtar, në disa zona të Maqedonisë Perëndimore dhe Epirit priten reshje të dendura bore, ndërsa era do të arrijë fuqinë deri në 10 ballë. Në Kostur, zjarrfikësit shpëtuan 35 pasagjerë të bllokuar në një autobus turistik për shkak të borës në rrugën drejt manastirit të Panagisë në Kleisoura.
Ministri i Mbrojtjes Civile ka paralajmëruar për reshje të dendura dhe erëra të forta në Maqedoninë Qendrore, Thesali dhe Atikë, duke u kërkuar autoriteteve lokale të marrin masa për mbrojtjen e qytetarëve.
Sondazh
Lexo gjithashtu
