Nën qiellin e hapur të Sheshit të Shën Pjetrit dhe përballë një turme prej qindra mijëra besimtarësh dhe liderësh botërorë, Papa Leoni XIV ka nisur meshën e tij të parë solemne si udhëheqës i Kishës Katolike.
Ceremonia nisi me lutjet tradicionale në latinisht, ku Papa tha: Vëllezër dhe motra, në këtë ditë të krijuar nga Zoti, ne risjellim në kujtesë pagëzimin tonë përmes shenjës së këtij uji.
Ky moment thekson rëndësinë e pagëzimit si themel i jetës shpirtërore dhe lidhjes së përhershme mes besimtarit dhe Zotit. Në qendër të kësaj meshë madhështore janë simbolet tradicionale të papatit – Palliumi dhe Unaza e Peshkatarit – që po i dorëzohen Papa Leoni XIV si shenjë e fillimit zyrtar të shërbesës së tij.
Të pranishëm në këtë meshë historike janë: Ursula von der Leyen, Presidente e Komisionit Evropian, Mbretërorët belgë, Philippe dhe Mathilde, Presidenti i Ukrainës, Volodymyr Zelenskyy, Zëvendëspresidenti amerikan, JD Vance, si dhe mbi 150 delegacione diplomatike nga e gjithë bota.
Në homelinë e tij të parë, Papa Leoni XIV ka theksuar rëndësinë e unitetit ndërkombëtar, duke i bërë thirrje botës për armëpushim të menjëhershëm në Gaza dhe Ukrainë, si dhe për më shumë solidaritet mes kombeve përballë vuajtjeve njerëzore dhe krizave globale.
Papa i ri, me origjinë nga Çikago dhe me përvojë pastorale në Amerikën Latine, po pritet si një zë i fortë për drejtësi sociale, kujdes për të varfërit dhe reformë brenda Kishës.
Atmosfera në Sheshin e Shën Pjetrit është solemne, me këngë liturgjike, lutje në shumë gjuhë dhe një ndjenjë të fortë bashkimi shpirtëror.
Sondazh
Lexo gjithashtu
