Ish-kryeministri i Greqisë Kostas Simitis është ndarë nga jeta në orët e para të mëngjesit të sotme në moshën 88-vjeçare.
Mediat greke bëjnë me dije se ish-kryeministri është dërguar sot në spitalin pa jetë. Ai u shpall i vdekur me të mbërritur në spital. Lajmin e ka bërë me dije drejtori i spitalit të Korinthit, Grigoris Karpouzis.
Kostas Simitis ishte një nga figurat më të rëndësishme politike të Greqisë moderne, duke lënë pas një trashëgimi të pasur politike.
Kush ishte Kostas Simitis
Kostas Simitis, profesor universiteti dhe politikan, ishte një nga personalitetet më të shquara të skenës politike moderne greke.
Ai ishte president i PASOK (30 qershor 1996 - 8 shkurt 2004) dhe kryeministër i Greqisë (18 janar 1996 - 10 mars 2004), duke lënë gjurmë në një epokë reformash të rëndësishme.
Pas rënies së Juntës në 1974, Simitis ishte një nga anëtarët themelues të Lëvizjes Socialiste Panhelene (PASOK). Gjatë karrierës së tij politike ka mbajtur shumë poste ministrore, duke kontribuar aktivisht në konsolidimin e partisë në pushtet.
Karriera e tij arriti kulmin më 18 janar 1996, kur pasoi Andreas Papandreun si kryeministër, pas votimit të Grupit Parlamentar të PASOK-ut. Duke përfaqësuar polin modernizues, ai u fokusua në reformën ekonomike dhe konvergjencën evropiane të Greqisë. Pak më vonë, më 30 qershor 1996, ai u zgjodh kryetar i PASOK-ut në Kongresin e IV-të të partisë.
Gjatë mandatit të tij, Simitis promovoi masa të stabilitetit ekonomik dhe një politikë të jashtme të moderuar.
Privatizimi gradual i sektorit publik dhe hyrja e Greqisë në Bashkimin Ekonomik dhe Monetar në 2001 ishin dy nga arritjet e tij më të dukshme.
Mandati i tij i dytë u karakterizua nga masa shtrënguese që synonin uljen e inflacionit dhe borxhit kombëtar, si dhe përpjekjet për të zgjidhur mosmarrëveshjet me Turqinë dhe problemin e Qipros.
Si president i PASOK-ut, Simitis theksoi integrimin evropian dhe përshtatjen e Greqisë ndaj sfidave të globalizimit. Deradikalizimi i diskursit politik të partisë ishte i lidhur me përpjekjen për ta përafruar vendin me standardet e Bashkimit Evropian.
Sondazh
Lexo gjithashtu
