Hapësire reklamuese

Rajoni

Kurti në takim me ambasadorët e QUINT-it, kërkon përkrahjen e tyre në Komitetin e Ministrave

Shkruar nga Newsbomb
Kurti në takim me ambasadorët e QUINT-it, kërkon përkrahjen
Mbledhja e kryeministrit të Kosovës, Albin Kurti me ambasadorët e shteteve të QUINT-it

Kryeministri i Kosovës, Albin Kurti është takuar me ambasadorët e shteteve të QUINT-it. Në një mbledhje të zhvilluar ditën e sotme në zyrën kryeministrore të Kosovës, Kurti ka kërkuar mbështetjen e tyre për anëtarësimin e Kosovës në Këshillin e Europës në përputhje me vlerësimet nga vetë institucionet e KiE-së dhe duke u bazuar në përparimet e dukshme që ajo ka bërë në fusha të ndryshme jetësore.

Nëpërmjet një komunikate për media, Zyra e Kryeministrit ka dhënë detaje të shtuara mbi atë se cfarë është diskutuar në këtë mbledhje. Sipas njoftimit të saj, në takim është diskutuar mbi zhvillimet aktuale dhe rreth procesit të anëtarësimit në Këshill të Evropës, ndërkohë që kryeministri Kurti u ka përmendur atyre edhe “letrën e garancisë”, përmes së cilës ai u zotua për themelimin e Asociacionit të komunave me shumicë serbe.

Kryeministri theksoi se deri më tani tri instanca të rëndësishme të Këshillit të Evropës (Juristët Eminentë, Raportuesja Dora Bakoyannis dhe Asambleja Parlamentare e Këshillit të Evropës) kanë konfirmuar se Republika e Kosovës plotëson standardet dhe kriteret për të qenë anëtare e plotë e kësaj organizate. Kushtet dhe parakushtet për anëtarësim, u vendosën në raportin e raportueses Dora Bakoyannis të cilat Republika e Kosovës i plotëson, duke përfshirë këtu edhe vendimin prej vitesh në pritje për Manastirin e Deçanit. Për më tepër, si shenjë gatishmërie dhe hap para, tre krerët shtetëror i dërguan letër të garancisë raportueses Dora Bakoyannis për adresimin e çështjeve të pas anëtarësimit të identifikuara nga Këshilli i Evropës”,- thuhet në komunikatën për media nga zyra kryeministrore e Kurtit.

Nisur nga raportimi i mediave kosovare, Kurti u ka thënë diplomatëve se Kosova është vendi më demokratik në Ballkanin Perëndimor, me një kushtetutë të avancuar e cila ofron të drejta të garantuara dhe zgjeruara për komunitet joshumicë, dhe tejkalon standardet ndërkombëtare, e vlerësuar kështu edhe nga Juristët Eminentë të Këshillit të Evropës, dhe se me “letrën e garancisë”, Kosova ka plotësuar të gjitha kriteret për anëtarësim, prandaj edhe çdo kërkesë tjetër është në shpërputhje me vetë votimin e Asamblesë Parlamentare të Këshillit të Evropës të 16 prillit, të mbështetur në masën 82% (131 kundrejt 29).

Gjithashtu, mësohet se Kurti ka deklaruar para mysafirëve të sotëm ndërkombëtarë se normalizimi i marrëdhënieve mes Kosovës dhe Serbisë zhvillohet në Bruksel dhe jo në Strasburg dhe se procesi i anëtarësimit në Këshill të Evropës është çështje e respektimi të drejtave të njeriut, demokracisë dhe sundimit të ligjit, vlera këto që Republika e Kosovës i përqafon ka përfunduar ai.

Këto dy procese nuk duhet të përzihen pasi nuk e ndihmojnë njëra-tjetrën. Në rast se këto përzihen, kjo do t’i bënte dëm të pariparueshëm në njërën anë dialogut në Bruksel dhe në anën tjetër Këshillit të

Evropës, si institucion i ruajtjes dhe promovimit të demokracisë dhe të drejtave të njeriut”,- thuhet në komunikatën.

Kurti u ka thënë atyre se çështja e vetëmenaxhimit për serbët nuk mund të nxirret nga pakoja e Marrëveshjes së Brukselit dhe Aneksit në Ohër.

Kryeministri theksoi se neni 7 i Marrëveshjes Bazike nuk mund të nxirret nga pakoja e Marrëveshjes së Brukselit dhe Aneksit në Ohër dhe nuk duhet të vendoset si prioritet dhe në qendër. Ai kujtoi se me 26 tetor, u refuzua oferta për t’u nënshkruar Marrëveshja në pako që do t’i hapte rrugën zbatimit të plotë të Marrëveshjes, duke përfshirë nenin 7 të saj ndërlidhur me nenin 10. Në këtë drejtim, Kryeministri e ritheksoi se dokumenti i ofruar si draft statut nga Lajçak për zbatimin e nenit 7 ndërlidhur me atë 10, nuk është pranuar me 26 tetor vitin e kaluar në Bruksel”,- bën të ditur komunikara e zyrës kryeministrore.

Ai i bëri thirrje shteteve aleate të Kosovës, shteteve të QUINT-it që të mbështesin anëtarësimin e Kosovës me 17 maj në përputhje me vlerësimet nga vetë institucionet e Këshillit të Evropës, dhe mbi bazën e arritjeve meritore në zhvillimin e demokracisë, të drejtave të njeriut, sundimit të ligjit dhe linjëzimit të saj me vlerat dhe qëndrimet perëndimore. Në kohën kur autokracitë në Evropë janë në rritje dhe po cenojnë çdo herë e më shumë demokracinë, sigurinë dhe paqen, arritjet demokratike të Kosovës duhet të festohen nga demokracitë perëndimore”,- përfundon komunikata.

Sondazh

Poll

Lexo gjithashtu

Hapësire reklamuese