Kryeministri Albin Kurti dhe ministrja e Industrisë, Rozeta Hajdari, morën pjesë në Forumin e Dytë Ekonomik Kosovë-Kroaci, zhvilluar në Zagreb. Në fjalën e tij, kryeministri Kurti theksoi përkushtimin për të forcuar marrëdhëniet ekonomike mes dy vendeve, duke nënvizuar potencialin e madh të Kosovës si një treg në zhvillim.
“Me Kroacinë, do të bashkëpunojmë për të krijuar mundësi të reja ekonomike, duke ndërtuar një mjedis biznesi të sigurt dhe konkurrues. Qëllimi ynë është që Kosova të shndërrohet në një nga tregjet më tërheqëse në Evropën Juglindore,” tha Kurti, duke shtuar se qeveria është një partner i gatshëm për investitorët.
Ai gjithashtu përmendi progresin ekonomik të Kosovës, duke përfshirë dyfishimin e eksporteve dhe investimeve të huaja, si dhe rritjen e qarkullimit të bizneseve me 60% krahasuar me 2019. Ligji i ri për investimet e huaja, krijimi i Agjencisë për Investime dhe Eksporte, dhe përparësitë në sektorët e energjisë, infrastrukturës dhe digjitalizimit janë pjesë e planeve për të tërhequr investitorët e huaj.
Forumi, i cili pason atë të janarit 2023 në Kosovë, përfaqëson një hap të rëndësishëm në forcimin e bashkëpunimit ekonomik mes Kosovës dhe Kroacisë. Pas përfundimit të vizitës në Kroaci, Kurti pritet të vazhdojë një vizitë pune në Slloveni.
Sondazh
Lexo gjithashtu
