Familjarët e avokatit dhe profesorit Sokol Mëngjesi u kanë kërkuar mjekëve të Spitalit të Traumës që 45 vjeçari të dërgohet në Greqi. Ata mendojnë se një trajtim i specializuar në një spital jashtë vendit mund të jetë më shpresëdhënës për jetën e Sokol Mëngjesit.
Kërkesa i është dërguar ekipit të mjekëve në Spitalin e Traumës, të cilët prej mëngjesit të së mërkurës janë duke e monitoruar çdo sekondë gjendjen e tij shëndetësore. Megjithatë, deri tani ata nuk kanë marrë një përgjigje.
Gazetarja Alma Demiraj raporton se shëndeti i profesorit është përmirësuar disi orët e fundit, pas 6 ditësh në koma artificiale.
Mëngjesin e kësaj të hëne Sokol Mëngjesi i është nënshtruar një skaneri në pjesën e kokës dhe fatmirësisht ka rezultuar se edema në tru ka ardhur duke u ulur. 45 vjeçari pritet të nisë një proces zgjimi nga koma, i cili mund të zgjasë, sepse mjekët do të fillojnë të ulin dozën e ilaçeve.
View this post on Instagram
Megjithatë, familja kërkon që avokati të dërgohet në një spital në Greqi, ku mund të marrë trajtim më të specializuar për goditjen që ka pësuar në pjesën e pasme të kokës, në tru.
Një ekip i madh profesionistësh të Spitalit Universitar të Traumës janë angazhuar për shëndetin e tij, duke monitoruar çdo sekondë Sokol Mëngjesin. Mjekët ulin sasinë e ilaçeve me të cilat mbahet pacienti, për t'i dhënë mundësi trupit të tij të reagojë.
Edema është enjtja e shkaktuar në inde si pasojë e goditjes/traumës që ka pësuar avokati Sokol Mëngjesi. Prania e saj në zonën e trurit e rëndon gjendjen e pacientit, por fakti që trupi i tij ka reaguar dhe masa ka ardhur duke rënë, është një tregues shpresëdhënës për bluzat e bardha.
Avokati Sokol Mëngjesi u dhunua mëngjesin e 29 majit sapo la djalin në kopsht në zonën e ish-bllokut.
Ishin 4 autorët të cilët e qëlluan me doreza hekuri dhe leva, të identifikuar si: Dorian Beqir Alia, 32 vjeç, banues në Tiranë, u vetëdorëzua në Polici; Drivald Sokol Alia, 21 vjeç, banues në Tiranë; Elton Ndue Kasaj, 33 vjeç, banues në Tiranë; Romario Roberto Tabaku, 26-vjeç, banues në Tiranë.
Organizatori dhe porositësi i sulmit barbar ndaj avokatit është Dritan Nano. 58-vjeçari do të dalë sot para gjykatës ku dhe do t’i komunikohet masa e sigurisë. Bashkë me të, për masë del dhe dhëndri i tij Dorian Alia, një nga dhunuesit, ndërsa 3 të tjerë janë ende në kërkim.
58-vjeçari Nano nuk pranonte të likuidonte avokatin sipas kontratës që kishin firmosur, pasi Mëngjesi fitoi gjyqin për pronën e një familje me 8 trashëgimtarë. Nano nuk ka respektuar detyrimet që ka pasur ndaj avokatit dhe studios ligjore.
Kanë qenë në total 8 trashëgimtarë që i përfaqësonte Mëngjesi dhe një nga ata nuk ka pranuar që të zbatojë kontratën dhe t’i paguajë detyrimet avokatit.
Sokol Mëngjesi ka kërkuar që të respektohet kontrata e firmosur para gjyqit, mirëpo vetëm njëri prej trashëgimtarëve, konkretisht 58-vjeçari Dritan Nano nuk ka pranuar të shlyejë pagesën. Për këtë avokati ka hapur gjyq ndaj Nanos, proces që e ka fituar dhe përmbarimi ka bllokuar pronën, duke mos e lejuar që të vijojë shitja.
© Newsbomb.al
Sondazh
Lexo gjithashtu
