Ministri i ri i Rindërtimit Arben Ahmetaj, ka folur sot lidhur me procesin e rindërtimit në zonat e dëmtuara nga tërmeti i 26 nëntorit.
Ahmetaj tha se Këshilli i Ministrave ka shpallur 18 zonat e reja për zhvillim dhe u bëri thirrje qytetarëve të përshpejtojnë aplikimin në platformën elektronike që të kalohet në hapat e tjerë.
Por teksa duket se gjithçka ka ngecur te aplikimi, mediat kanë nisur të kërkojnë llogari se pse nuk kanë nisur ndërtimet në Thumanë duke hedhur dyshime mbi fatin e miliona eurove të mbledhura nga OJF-të.
Këto sulme, Ahmetaj i cilësoi si të pamerituara dhe falenderoi organizatat për bashkëpunimin dhe sinergjinë.
“Dua të falenderoj edhe OJF-të që janë angazhuar në procesin e rindërtimit, që i janë nënshtruar njëlloj këtij procesi dhe ju shpreh këtyre organizatave që kanë kontribuar e vazhdojnë të kontribuojnë në procesin e rindërtimit, solidaritetin për goditjet mediatike të pamerituara që kanë tentuar të vënë në dyshim integritetin e tyre. Edhe njëherë i falenderoj për bashkëpunimin sinergjinë dhe solidaritetin”, u shpreh ministri.