Presidenti Ilir Meta ka shprehur ngushëllimet për ndarjen nga jeta të gazetarit, publicistit dhe kryeredaktorit të gazetës Dielli, Dalip Greca.
Meta shprehet se Greca pati një kontribut të vyer në forcimin e ndërgjegjes kombëtare, ruajtjen e traditave dhe kulturës së shqiptarëve të Amerikës.
Mesazhi i Metës:
Thellësisht i trishtuar nga lajmi për ndarjen e papritur nga jeta të gazetarit të mirënjohur shqiptar në SHBA, publicistit dhe kryeredaktorit të gazetës shekullore ‘Dielli’, organ i Federatës Panshqiptare ‘Vatra’, Dalip Greca.
Me një kontribut të vyer për forcimin e ndërgjegjes kombëtare, ruajtjen e traditave dhe kulturës të shqiptarëve të Amerikës, si dhe për devotshmërinë e dëshmuar për fuqizimin e marrëdhënieve të shkëlqyera mes dy popujve tanë, kujtimi i tij do të mbetet i paharruar.
Ngushëllimet më të sinqerta familjes, miqve dhe bashkëpunëtorëve, vatranëve dhe komunitetit të dashur shqiptaro-amerikan.
Të prehet në paqe!