Presidenti kinez Xi Jinping ka paralajmëruar se ekziston mundësia që koronavirusi të rikthehet pasi pandemia globale vazhdon të përhapet.
Mediat e huaja raportojnë se në një takim mes trupit të lartë vendimmarrës të Partisë Komuniste Kineze dhe Komitetit të Përhershëm të Byrosë Politike, Presidenti tha se autoritetet e shumta po merren me presionin e ekonomisë globale, ndërsa faktorët e pasigurisë ndaj virusit po rriten.
Presidenti Jinping u ka bërë thirrje autoriteteve kineze që të vëzhgojnë me kujdes rastet e importuara nga jashtë dhe të parandalojnë një tjetër valë shpërthimi.
"Vështirësi dhe sfida të reja janë shfaqur për rinisjen e punës në Kinë dhe zhvillimin ekonomik e shoqëror," ka thënë Presidenti kinez.
Përhapja e koronavirusit në Kinë duket se është në kontroll pasi ka shumë pak raste të reja. Ditën e mërkurë qyteti i Wuhan që ishte edhe qendra ku shpertheu virusi, përfundoi izolimin e tij.