Presidenti i SHBA Joe Biden do të takohet me udhëheqësit palestinezë në Bregun Perëndimor të pushtuar, këtë të premte, përpara se të fluturojë për në një samit të diskutueshëm në Arabinë Saudite. Takimi i tij me presidentin palestinez Mahmoud Abbas ka të ngjarë të jetë i tensionuar.
Analistët thonë se lidhjet mes dy vendeve kanë qenë në rënie nën administratën Trump. Takimi i presidentit Biden me Presidentin Abbas në Betlehem do të jetë takim i nivelit më të lartë midis SHBA-së dhe palestinezëve që kur palestinezët ngrinë marrëdhëniet në një mosmarrëveshje mbi mbylljen e zyrës në Uashington të Organizatës për Çlirimin e Palestinës (PLO), nga administrata Trump në 2018.
Palestinezët duan që SHBA të bëjë më shumë për të rifilluar bisedimet e paqes me Izraelin dhe për të rihapur konsullatën amerikane në Jerusalem, e cila shërbeu si një ambasadë de facto për palestinezët përpara se të mbyllej, përsëri nën Presidentin Trump në 2019.
Më vonë, Biden do të udhëtojë në Arabinë Saudite për të takuar sundimtarin e saj de-fakto, Princin e Kurorës Mohammed bin Salman.
Dy vjet më parë, Biden ishte zotuar ta bënte Arabinë Saudite përgjegjëse lidhur me vrasjen e vitit 2018 në Turqi të gazetarit disident saudit Jamal Khashoggi, nga agjentët sauditë. Princi mohon përfshirjen, por inteligjenca amerikane arriti në përfundimin se ai e miratoi atë.
Temat e diskutimit për liderët do të përfshijnë furnizimin me energji, të drejtat e njeriut dhe bashkëpunimin e sigurisë.
Arabia Saudite është prodhuesi më i madh i naftës në botë dhe përpjekja për rivendosjen e marrëdhënieve pason një rritje të çmimeve të naftës, e nxitur nga lufta e Rusisë në Ukrainë. SHBA pritet të shtyjë zyrtarët sauditë që të angazhohen për rritjen e prodhimit.