Fredi Beleri me shumë gjasa do të jetë eurodeputet në parlamentin europian, pas rezultateve bindëse të zgjedhjeve në Greqi.
Teksa mbështetësit e tij kanë nisur të festojnë kreu i PBDNJ-së, Vangjel Dule e etiketoi fitoren e Belerit si një mësim për autokratët, si një mesazh të koduar për Ramën. Në një prononcim për Euronews Albania ai tha se e sotmja është një natë e madhe gëzimi për qytetin.
“Është një mësim për të gjithë autokratët, siç është rasti i zotit Rama. Demokracia nuk njeh qorsokaqe, betejat për demokracinë të çojnë rezultatin e dëshiruar. Në vendin tonë nuk funksionon shteti i së drejtës me standard evropiane. Nuk kemi demokraci funksionale, nuk kemi standarde zgjedhjesh. Kemi një kryeministër që përdor gjuhë urrejtje dhe mbjell përçarje, këto nuk janë fenomene që kanë të bëjnë me Bashkimin Evropian ku duam dhe ne të jemi anëtarë”, tha Dule.
Përsa i përket votave të kandidatëve nga Demokracia e Re kryeson Giorgos Avtias me një mijë vota diferencë nga i dyti Evangelos Meimarakis. Treshja mbyllet me Fredi Belerin, i ndjekur nga Manolis Kefalogiannis, me Eliza Vozeberg dhe Dimitris Tsiodras më pas. Në vendin e shtatë është Eleonora Meleti, e ndjekur nga Vassilis Kontozamanis dhe Pirro Dhima. Mirëpo duke qenë se Greqia ka marrë vetëm 7 vende në PE, Vassilis Kontozamanis dhe Pirro Dhima nuk do të bëhen pjesë.
Fredi Beleri ishte kandidat për kryetar Bashkie në Himarë në zgjedhjet vendorë të vitit të shkuar, por ai u arrestua nën akuzën për korrupsion, pasi tentoi që të blinte me para votën e qytetarëve himariotë.
Gjithashtu, partia e kryeministrit grek Kyriakos Mitsotakis e propozoi atë që të kandidonte për eurodeputet në zgjedhjet e Parlamentit Europian, një lëvizje që i garantoi sukses, duke qenë se deri më tani ka mundur të sigurojë vendin e tretë.
Në lidhje me kandidimin e tij për eurodeputet, Beleri deklaroi pak kohë më parë se është një nder i madh që i ka bërë kryeministri grek Kyriakos Mitsotakis.
“Zgjedhja ime në Parlamentin Europian, nëse bëhet me ndihmën e Zotit dhe, natyrisht, të grekëve kudo, do të më japë mundësinë të vazhdoj luftën time për demokraci dhe për shtet ligjor. Nga kjo betejë duhet të dalim krenarë dhe të lirë. Forca e tyre më jep forcë për të duruar dhe për t’i çuar gjërat më tej. Të çojmë zërin e minoritetit grek në Europë”, tha Beleri.
Sondazh
Lexo gjithashtu
