E shoqëruar nga kryeministri Edi Rama, ministrja e Arsimit dhe Sportit, Ogerta Manastirliu udhëtoi këtë të hënë në Berat, pikërisht në shkollën “Babë Dudë Karbunara”, një prej 25 shkollave të rej të ndërtuara në të gjithë vendin.
Në ditën e parë të shkollës ministrja ka bërë premtimin për mësuesit duke thënë se rritja e pagave për ta do të vijojë.
Përpos urimit për 350 mijë nxënësit në vendin tonë dhe mbi 31 mijë mësuesit për këtë vit të ri shkollor, ministrja theksoi se investimi në arsim do të vazhdojë.
“Prej një korrikut 31 mijë mësues jo vetëm i është rritur paga, por paga mesatare është 950 euro. Ne do vijojmë me politikën e rritjes së pagave, por ky ishte një kapërcim që ne bëmë”, tha ministrja.
Ndër të tjera ajo u shpreh se do të ndryshojë edhe mënyra e kualifikimit për mësuesit, që do të nisë nga 3 vite pune, 5 dhe 18 vite.
Pjesë nga fjala e ministres:
Sot shoh me kaq shumë adhurim dhe emocioni breza mësuesish, figura që vërtet kanë një kontribut të madh për vendin tonë dhe do të përçojnë një trashëgimi ndër breza
Sot unë kam një urim për 350 mijë nxënësit në Shqipëri për mbi 31 mijë mësues që ky vit të jetë i mbarë, i suksesshëm. Me plot arritje për nxënësit me plot pasion për mësuesit dhe për të gjithë prindërit, pritshmëritë e të cilëve janë të mëdha. Ne do punojmë çdo ditë për të arritur këto pritshmëri për ta bërë sistemin tonë arsimor më gjithëpërfshirës me cilësor dhe më të barabartë.
Nuk do mungojë asnjëherë investimi për arsimin, për nxënësit dhe mësuesit. Kjo shkollë është model, më bëhet qejfi që përtej Tiranës shohim shkolla të bukura që nxënësit të zhvillohen njësoj.
Prej një korrikut 31 mijë mësues jo vetëm i është rritur paga, por paga mesatare është 950 euro. Ne do vijojmë me politikën e rritjes së pagave, por ky ishte një kapërcim që ne bëmë
Për mësuesit kemi edhe një hapësirë, që është programi i zhvillimit të mësuesve. Ky program parashikon një mbështetje për kualifikimin dhe edukimin në vazhdim të tyre. Kemi filluar me trajnimin e 4 mijë mësuesve të shkencave, të arsimit fillor, gjuhës shqipe dhe do të vazhdojmë me trajnimin e 16 mijë mësuesve të këtyre degëve.
Tashmë mësuesit do të kualifikohen më shpejt. Periudha e kualifikimit dhe e shkallëve të kualifikimit do jetë në 3 vitet e para të punës, në vitin e 8 të punës dhe vitin e 15.
Për herë të parë do të kemi një testim të informatizuar për kualifikimin e parë të mësuesit dhe sërish për herë të parë Universitetet Publike do të trajnojnë mësuesit.
Sondazh
Lexo gjithashtu
