SPAK ka shpallur moskompetencën për shqyrtimin e kallëzimit të bërë nga Partia Demokratike për zyrtarët e lartë të Policisë së Shtetit në lidhje me protestën e zhvilluar më datë 23 dhjetor, duke i akuzuar për për shpërdorim detyre e kryerje të veprimeve arbitrare gjatë tubimit të mbajtur nga opozita.
Në dokumentin e bërë publik të firmosur nga kreu i Strukturës së Posaçme, Altin Dumani, se ky kallëzim i është deleguar Prokurorisë së Tiranës për kompetencë.
“Ndodhur në këto kushte, vlerësohet se duhet të kryhen verifikime të mëtejshme në lidhje me faktet e pretenduara nga kallëzimtari në këtë rast kallëzim në lidhje me veprimet e pretenduara të kryera nga Drejtoria e Policisë Vendore Tiranë dhe veprimet e punonjësve të policisë që kanë shoqëruar më pas protestën/tubimin e Partisë Demokratike të zhvilluar më dt. 23.12.2024 ora 17:00, veprime këto që nga të dhënat e ofruara deri tani konstatohet se orientohen në drejtim të të veprave penale të parashikuara nga nenet 90, 248, 250, 251, 253, 261 të Kodit Penal.
Nëse pas verifikimeve apo hetimeve të kryera nga ana Juaj, do të rezultojnë elementë të figurave të veprave penale të parashikuara nga neni 75/a i Kodit të Procedurës Penale, apo ku autorë të mundshëm të veprës penale, do të jenë subjekte për hetimin e të cilëve kompetencë është Prokuroria e Posaçme Kundër Korrupsionit dhe Krimit të Organizuar, të na ridërgohen aktet e procedimit penal në fjalë.
Përsa më sipër ju përcillet për kompetencë materiali kallëzues i mësipërm, pasur parasysh kompetencën lëndore dhe territoriale, në respektim të neneve 75/a, 76 dhe 28 të K. Pr. Penale.
Duke ju falënderuar për mirëkuptimin.
DREJTUESI I PROKURORISË
Altin Dumani”
Partia Demokratike ka dorëzuar një ditë pas protestës në SPAK një kallëzim kundër zyrtarëve të lartë të Policisë së Shtetit duke i akuzuar këta të fundit për shpërdorim detyre si dhe kryerjen e veprimeve arbitrare.
Zyrtarët e kallëzuar në SPAK nga Partia Demokratike:
Ervin Hoxha – Ministër i Brendshëm;
Ilir Proda – Drejtor i Përgjithshëm i Policisë së Shtetit;
Elton Alushi – Drejtor i Drejtorisë Vendore të Policisë Tiranë;
Fatmir Çelaj – punonjës i Policisë së Shtetit;
Farush Likaj – punonjës i Policisë së Shtetit;
Robert Losha – Shefi i Komisariatit nr. 1, Tiranë;
Në njoftimin e dhënë nga Partia Demokratike, 6 zyrtarët e shtetit akuzohen për veprat penale “Dëmtime të tjera me dashje”, “Shpërdorimi i detyrës”, “Kryerja e veprimeve arbitrare”, “Mosmarrja e masave për të ndërprerë gjendjen e paligjshme”, “Shkelja e barazisë së shtetasve”, “Pengim në ushtrimin e të drejtës për t’u shprehur, grumbulluar apo manifestuar”, të kryera në bashkëpunim.
Sondazh
Lexo gjithashtu
