Kryeministri Edi Rama ndodhet në Madrid, ku ka marrë pjesë në një audiencë të organizuar nga Mbreti Felipe VI i Spanjës me personalitete të njohura nga bota juridike, në kuadër të ceremonisë së ndarjes së çmimit "Universal Spanjisht" 2024 për avokatin Javier Cremades.
Në delegacionin që shoqëron Ramën, ndodhen Ministri i Drejtësisë Ulsi Manja, Ministrja e Shtetit për Administratën Publike dhe Antikorrupsionin Adea Pirdeni, deputeti Fatmir Xhafaj dhe politikani Alket Hyseni. Po ashtu, e pranishme në këtë takim ishte edhe ambasadorja shqiptare në Spanjë, Entela Gjika.
Në këtë aktivitet kanë marrë pjesë edhe personalitete të tjera të rëndësishme, si Kryetari i Gjykatës Kushtetuese të Spanjës, Cándido Conde-Pumpido, dhe Kryetari i Gjykatës Kushtetuese të Gjermanisë, Stephan Harbarth.
Edi Rama vlerësoi njohjen ndërkombëtare të progresit të Shqipërisë, duke ndarë në mediat sociale se ngjarja përfaqëson një "mundësi të madhe" për të shfaqur përparimet e Shqipërisë në demokraci dhe sundim të ligjit.
Një nga momentet më të rëndësishme të kësaj vizite është fakti që Shqipëria është përzgjedhur si vendi pritës i Kongresit Botëror të Ligjit në vitin 2027, një event madhor që mbledh profesionistë të fushës juridike nga e gjithë bota. Kjo është një mundësi e rëndësishme për Shqipërinë për të theksuar progresin në reformat ligjore dhe demokracinë.
Sondazh
Lexo gjithashtu
