Ish-kryetari i Bashkisë Lezhë, Fran Frrokaj, i shpallur në kërkim që prej 23 dhjetorit 2024, pas vendimit të Gjykatës së Apelit që e riktheu në burg, ka dorëzuar rekurs në Gjykatën e Lartë. Ai kërkon pezullimin e dënimit me 2.8 vite burg për shpërdorim detyre, deri në shqyrtimin e rekursit.
Fillimisht, Gjykata e Posaçme e Shkallës së Parë e kishte dënuar Frrokajn me 1.4 vite burg, por vendimi u ashpërsua nga Apeli, që dyfishoi dënimin. Pas marrjes së urdhrit të ekzekutimit, policia ka kryer kontrolle në banesën e tij, por nuk e ka gjetur.
Fran Frrokaj akuzohet për përfshirje në regjistrimin e paligjshëm të 82 pasurive të paluajtshme në zonën e Ranës së Hedhun në Shëngjin, gjatë kohës kur ishte kryetar i komunës Shënkoll. Prokuroria zbuloi se toka prej 234 mijë metrash katrorë ishte përvetësuar përmes falsifikimit të dokumenteve, duke u regjistruar në emër të personave që nuk kishin të drejtë përfitimi.
Në një tjetër çështje, Frrokaj u dënua me 2 vite burg nga Gjykata e Shkodrës për tjetërsim pronash në të njëjtën zonë. Edhe pse përfitoi nga amnistia dhe u lirua më herët, ai tani përballet me rikthimin në qeli.
Frrokaj, i cili më parë ishte dënuar me 4 vite burg, e ka kundërshtuar vendimin, duke pretenduar pafajësi. Në anën tjetër, Prokuroria e Apelit ka kërkuar shqyrtim të çështjes, duke argumentuar për shkelje procedurale në procesin gjyqësor.
Sondazh
Lexo gjithashtu
