Kryeministri Edi Rama këtë të enjte ndodhet në Hungari, Budapest ku dhe do të marrë pjesë në takimin e Komitetit Politik Europian. Para nisjes së këtij takimi kreu i qeverisë shqiptare ka folur për mediat ku dhe ka prekur një sërë temash, madje dhe fitoren e Donald Trump në zgjedhjet presidenciale si dhe për atë çfarë Europën dhe Shqipërinë e pret në vijim.
I pyetur nga gazetarët nëse NATO ndihet e kërcënuar nga rikthimi i Trumpit në krye të SHBA-s, Rama u përgjigj duke thënë se edhe në mandatin e parë kur të gjithë pohonin se do të ndodhte një dobësim i Organizatës së Traktatit të Atlantikut të Veriut krejt e kundërta ndodhi.
“Mënyra si e shoh unë është se është bërë shumë zhurmë ndoshta jo në mënyrën e duhur për kthimin e tij të mundshëm. Përgoja më thotë që kur ishte president dhe të gjithë thonin se NATO do të bëhej më e dobët, NATO u bë më e fortë që kështu le të shohim dhe të mos bëhemi histerikë para se të shohim realitetin.
SHBA janë SHBA dhe nuk mendoj që kjo do të jetë domosdoshmëri e keqe për Evropën”, tha Rama duke theksuar më tej se Shqipëria është vendi më pak i prekur pasi prej vitesh ka pasur marrëdhënie korrekte dhe diplomatike me Shtetet e Bashkuara të Amerikës.
"Besoj se ajo çfarë është thënë, ajo çfarë është diskutuar intensivisht përpara zgjedhjeve evropiane, shkoi shumë larg dhe ndërkohë ajo çfarë ndodhi me zgjedhjet në Shtete e Bashkuara të Amerikës mund të përbëjë një mundësi për të riformësuar shumë gjëra, për ta parë botën paksa ndryshe, për ta parë vetë Europën paksa ndryshe sepse Evropa po bëhet më e vjetër. Ka nevojë për më shumë energji, për më pak rregullime dhe ndoshta është mundësi për të vënë në lëvizje gjërat.
Shtetet e Bashkuara të Amerikës janë Shtetet e Bashkuara të Amerikës dhe në fund të fundit Shtetet e Bashkuara të Amerikës mendoj se janë më të forta se çdokush që është në Shtëpinë e Bardhë, nga njëra anë dhe nga ana tjetër, e thashë, ajo çfarë ka ndodhur në Shtetet e Bashkuara të Amerikës mund të jetë një gjë shumë e mirë për Evropën", tha ai.
I pyetur në lidhje me presidentin urakinas, Volodymyr Zelensky dhe ndikimin e Trump në luftën Rusi-Ukrainë, Rama u përgjigj duke thënë se: I thashë Zelenskyt se nuk është diçka për tu shqetësuar. Nuk është domosdoshmërisht për t’u shqetësuar, por diçka për t’u reflektuar, për të pasur një Evropë më të fortë.
Kryeministri Edi Rama ndodhet sot në Budapest, Hungari, për të marrë pjesë në takimin e pestë të Komunitetit politik Europian, së bashku me 47 kryetarë shtetesh e qeverish nga e gjithë Europa.
Liderët pjesëmarrës do të diskutojnë mbi sfidat e sigurisë me të cilat përballet Europa, në seancën plenare, e cila do të pasohet nga katër sesione kryesore mbi temat e migracionit dhe sigurisë ekonomike. Sesioni për migracionin do të përfshijë të gjitha aspektet e migracionit, ndërsa ai për sigurinë ekonomike do të diskutojë edhe lidhjen në aspektin e energjisë, transportit, IT-së dhe gjithashtu tregtisë globale.
* * *
-Samiti i tjetër i komunitetit është në Shqipëri. Cilat janë objektivat, ndryshimi i klimës, të tjera?
Kryeministri Edi Rama: Po. Po marrim stafetën këtu për takimin e ardhshëm të Komunitetit Politik Evropian në Shqipëri gjysmën e parë të vitit që vjen, dhe sigurisht ka shumë gjëra për të diskutuar. Ndryshimi i klimës është i kudogjendur dhe në krye të përparësive të vendeve evropiane, sigurisht, por ka edhe çështje të tjera për të diskutuar. Ne jemi shumë krenarë që të kemi mundësi që ta mikpresim këtë takim.
-Pyetje lidhur me zgjedhjen e Presidentit të ri të Amerikës.
Kryeministri Edi Rama: Mënyra si e shoh unë është se është bërë shumë zhurmë, ndoshta, jo në mënyrën e duhur për kthimin e tij të mundshëm. Përvoja më thotë që kur ishte president dhe të gjithë thonin se NATO do të bëhej më e dobët, NATO-ja u bë më e fortë. Kështu që, le të shohim dhe le të mos bëhemi histerikë përpara se të shohim realitetin. Shtetet e Bashkuara të Amerikës janë shtetet e Bashkuara të Amerikës, dhe nuk mendoj që kjo do të jetë domosdoshmërisht diçka e keqe për Evropën. Mund të jetë një gjë shumë e mirë për Evropën.
-Po çfarë do t'i thoni Zelenskit sot, kur të vijë? Çfarë do t'i thoni të atij?
Kryeministri Edi Rama: Ja kam thënë, mendoj që nuk është domosdoshmërisht diçka për t'u shqetësuar për shkak të tij, por diçka për të reflektuar, për të bërë shumë më tepër për të pasur një Evropë shumë më të fortë. Kur u zgjodh herën e parë, të gjithë po dridheshin, sepse ndoshta NATO-s do t'i vinte fundit, por NATO-ja u bë më e fortë.
Ndaj, nuk mendoj se ajo çfarë ka ndodhur në Shtetet e Bashkuara të Amerikës është diçka që duhet ta shohim si shqetësuese. Në të kundërt, mund të jetë një mundësi e madhe për të bërë gjërat ndryshe për ne dhe për botën.
-Po lidhur me stabilitetin në Gjermani, me rënien e koalicionit?
Kryeministri Edi Rama: Dëgjo, unë jam Kryeministri i Shqipërisë. Jam më i gjati mes tyre, por përfaqësoj një vend të vogël, kështu që nuk më takon mua të mendoj për të gjitha gjërat e mëdha. Për Shqipërinë nuk nënkupton asgjë, sepse asgjë nuk ndryshon. Shqiptarët janë komuniteti më pro-amerikan në Evropë, kështu që kushdo të jetë në Shtëpinë e Bardhë, nuk bën ndonjë dallim të madh, sepse Shtetet e Bashkuara të Amerikës janë Shtetet e Bashkuara të Amerikës. Kështu që ne jemi shumë më pak të prekur nga këto lloj emocionesh, sepse për ne është e njëjta gjë.
-Si e shihni propozimin për migrantët?
Kryeministri Edi Rama: Pyesni Giorgia se po vjen tani.
Sondazh
Lexo gjithashtu
