Hapësire reklamuese

Politikë

Dumani dhe Millonai kërkojnë kohë, shtyjnë me 3 muaj afatet për Arben Ahmetaj

Shkruar nga Newsbomb
Dumani dhe Millonai kërkojnë kohë, shtyjnë me 3 muaj afatet
Ilustrim: Arben Ahmetaj dhe SPAK

Hetimet për ish-zv.kryeministrin Arben Ahmetaj do të vazhdojnë dhe për tre muaj të tjerë. Kështu kanë kërkuar prokurorët Altin Dumani dhe Enkeleda Millonai më 21 Qershor, duke marrë dhe aprovimin e Gjykatës së Posaçme.

Avokatët e ish-zv.kryeministrit janë njoftuar për vendimin dhe pritet që në muajt shtator-tetor, pasi të kenë përfunduar hetimet, dosja të dërgohet për gjykim.

Arben Ahmetaj ndodhet prej rreth një viti në arrati, pasi ka refuzuar përballjen me drejtësinë, duke thënë se procesi dhe provat janë manipuluar, për ta goditur atë politikisht. Nga Zvicra ku ka aplikuar për azil, ai ka thënë se do të përballet me drejtësinë vetëm kur ajo të jetë e drejtë dhe e vërtetë.

Arben Ahmetaj akuzohet nga SPAK për veprat penale:

- “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, vetëm dhe në bashkëpunim, në formën e deklarimit të rremë, dhe në formën e fshehjes, parashikuar nga neni 257/a paragrafi i dytë, neni 25 i K.Penal,

- “Korrupsionit pasiv të funksionarëve të lartë shtetërorë ose të zgjedhurve vendorë” parashikuar nga neni 260 i K.Penal, 6 (gjashtë) herë;

- “Pastrimit të produkteve të veprës penale ose veprimtarisë kriminale”, në bashkëpunim, më shumë se një herë, parashikuar nga neni 287 paragrafi i dytë i K.Penal.

Ndaj tij janë duke u kryer hetime për më shumë se një procedim penal dhe nuk dihet saktësisht se për cilin prej tyre prokurorët Altin Dumani dhe Enkeleda Millonai kanë kërkuar zgjatje të hetimeve. Megjithatë, procesi penal ndaj ish-zv.kryeministrit vazhdon edhe me qëndrimin e tij në arrati.

Ish-ministri Arben Ahmetaj akuzohet se ka përfituar një vilë, truall dhe mijëra euro nga pronarët e kompanisë së inceneratorëve. Sipas SPAK, Ahmetaj ka përfituar në mënyrë të tërthortë 170 mijë euro në vitet 2016 dhe 2017, truall + ndërtesë në Hamallaj, e përfituar në vitin 2017 nga shtetasit Klodian Zoto dhe Mirel Mërtiri, si dhe 130 mijë euro në 2018.

Ndërkohë, ish-zv.kryeministri akuzohet dhe për privatizimin e ish-ndërmarrjes shtetërore fabrikës “Buka.sha”. Dosja është hetuar nga prokurori Elvin Gogaj, i cili u ka komunikuar avokatëve akuzën e re për Arben AHmtaj. Sot, në atë vend ndodhet qendra "Emerald".  

Sondazh

Poll

Lexo gjithashtu

Hapësire reklamuese