Hapësire reklamuese

Politikë

Edi Rama në krah të Veliaj: Mbështes Erionin pa i hequr asnjë pikë e asnjë presje!

Shkruar nga Newsbomb
Edi Rama në krah të Veliaj: Mbështes Erionin pa i hequr
Edi Rama dhe Erion Veliaj

Kryeministri Edi Rama ka reaguar publikisht pas deklaratës së bërë këtë të shtunë nga kryebashkiaku Erion Veliaj, sa i përket prangosjes së ish-drejtorëve të tij, ku dhe u shpreh se Taulant Tusha, Mariglen ato dhe Redi Molla, duhet të përballen të vetëm me drejtësinë dhe akuzat që SPAK u ka vënë mbi shpinë.

Përmes një postimi në platformën “x”, kreu i qeverisë, i cili njëherësh është edhe kreu i Partisë Socialiste,  ka mbështetur qëndrimin e kryebashkiakut të Tiranës, duke ritheksuar se qëndrimet e tyre dëshmojnë qartë se nuk kanë kontroll mbi SPAK-un.

“Dëshmojnë edhe njëherë se ne as nuk e kontrollojmë SPAK-un, as nuk kemi ndërmend të ndryshojmë qasjen fuqimisht mbështetëse për SPAK-un, as nuk komentojmë çfarëdoqoftë lidhur me vërtetësinë e akuzave të SPAK-ut, për këdoqoftë që SPAK-u merr të pandehur dhe as nuk kemi asnjë lidhje me dokrrat e segmentit politik e mediatik, që prodhon përditë baltë e helm në seanca parlamentare, shfaqje televizive e kanale digjitale, ku lloj-lloj pjellash të mendësisë së errët inkuizicionale, na bëjnë gjyqe si ato të komunizmit, duke u përpjekur të na fusin të tërëve në çdo trastë e thes korrupsioni që hapet nga SPAK-u!”, shkruan Rama.

Rama u shpreh se ky rast tregon se mbështetja e socialistëve për SPAK-un nuk është propagandë, po vullnet i hekurt politik. Duke inkurajuar më tej punën e organeve të drejtësisë, kryeministri Rama shton se Drejtësia e Re duhet të vazhdojë vetëm përpara, pa mbështetur askënd dhe pa i lënë “kusur” askujt që përdorur flamujt e partive.

Në fund kreu i qeverisë thekson se synimi i tyre është që ta bëjnë Shqipërinë Europiane 2030 me reforma të vërteta.

“Prandaj qentë le të lehin, Shqipëria do të shkojë përpara, me qeverinë e Partisë Socialiste që do të ecë vetëm përpara, me Drejtësinë e Re që duhet të vazhdojë vetëm përpara, pa i lënë kusur askujt që përdor flamujt e partive, majtas e djathtas, lart apo poshtë, për të nxjerrë përfitime të paligjshme për veten a të afërmit e vet, duke punuar për shtetin me një xhep të dukshëm për të ardhurat nga puna dhe me një xhep të fshehtë për paratë e marra me korrupsion”, shkruan kryeministri ndër të tjera.

Kujtojmë se këtë të shtunë kryebashkiaku Erion Veliaj reagoi për herë të parë pas arrestimit të zyrtarëve të Bashkisë së Tiranës.  Përmes një videomesazhi, drejtuar qytetarëve, Veliaj pohoi se i vjen keq që bashkëpunëtorët e tij kanë bërë "punë të pista për përfitime personale".

Teksa u kujdes të përdorte fjalën "faj", kryebashkiaku evidentoi se nuk e ka bërë kurrë një të tillë, duke përdorur firmën, fjalën apo ndikimin e tij për përfitime të paligjshme personale. Erion Veliaj u shpreh i hapur edhe për hetimet për inceneratorin e Tiranës.

"Gabime mund të kem bërë dhe unë plot. S'kam asnjë dyshim, po nuk e kam bërë kurrë fajin që ta përdor firmën time, fjalën time, ndikimin tim, për çfarëdolloj përfitimi personal të paligjshëm. Uroj që këtë ta vërtetojnë deri në fund edhe këto hetimet tjera të inceneratorit të Tiranës, me të cilin e vetmja gjë që më ka lidhur ka qenë pastrimi i këtij qyteti, shembullor në pastërti", tha Veliaj ndër të tjera.

Postimi i plotë:

• S’mund të jem më shumë dakord me sa u tha sot kryebashkiaku Erion Veliaj qytetarëve të Tiranës, në mesazhin e drejtëpërdrejtë lidhur me ndalimin nga SPAK-u të disa ish-drejtorëve e drejtorëve të bashkisë!

• Mendësia e vjetër komuniste, fatkeqësisht ende shumë e pranishme në mënyrën e të parit të tjetrit si armiku që duhet shkatërruar (falë trashëgimisë së hidhur në një segment të tërë të politikës e të medias shqiptare të një komunisti fanatik, të konvertuar në liderin trushpëlarës të krejt atij segmenti që nga dita e parë e pluralizmit deri sot) nakatosur me thashetheme kafenesh, mllefe interesaxhinjsh dhe interesa gjobaxhinjsh, nëpër ekrane e portale që u ngjajnë tabelave të fletë-rrufeve të komunizmit, prodhon përditë baltë e helm me çështjet e drejtësisë! Po kësaj s’kemi ç’i bëjmë për sa kohë shpifjet e politikanëve dhe denigrimet e killerave mediatikë,  janë bërë pjesë e jetës sonë publike të kthyer në një xhungël ku s’e merr vesh i pari të dytin, ku nuk debatohet me argumenta po vetëm propagandohet me akuza e bërtitet për të mos lënë tjetrin të flasë, ku liria e shprehjes është bërë liri e shpifjes, ku shpifësit përveçse me votë nuk ndëshkohen as me ligj e as me zakon, po vetëm zaptojnë me pafytyrësi që edhe në Kanunin e vjetër të shqiptarëve, edhe në çdo libër edukate të qytetërimit demokratik, konsiderohet shkelje e pafalshme.

• Por ky i sotmi është përsëri rasti për të thënë me zë të lartë, se mbështetja jonë për SPAK-un nuk është propagandë, po vullnet i hekurt politik; qëndrimi ynë pa koment, sa herë SPAK-u godet brenda strukturave të ekzekutivit në çdo nivel, nuk është strukje, as frikë, po shprehje shembullore e vijës së kuqe mes nesh, partisë që qeveris e udhëheq Reformën në Drejtësi dhe Drejtësisë së Re që ka të gjithë mbështetjen tonë; goditjet e SPAK-ut ndaj kujtdqoftë në radhët e ekzekutivit, në çdo nivel të qeverisjes, që ka shkelur ligjin dhe ka tradhëtuar misionin tonë në shërbim të këtij vendi e të këtij populli, ne nuk i përjetojmë si gjëma, as si fajësi kolektive, po si një ndihmë të paçmuar në një luftë kundër korrupsionit, të cilën deri dje nuk e bënim dot sa e si duhej, pikërisht sepse mungonte krahu i drejtësisë së pavarur!

• Kështu që edhe kjo çështja më e fundit e disa ish-zyrtarëve e zyrtarëve të bashkisë Tiranë, edhe qëndrimi i drejtë i Erionit sot, me të cilin bashkohem fjalë e presje, dëshmojnë edhe njëherë se ne as nuk e kontrollojmë SPAK-un, as nuk kemi ndërmend të ndryshojmë qasjen fuqimisht mbështetëse për SPAK-un, as nuk komentojmë çfarëdoqoftë lidhur me vërtetësinë e akuzave të SPAK-ut, për këdoqoftë që SPAK-u merr të pandehur dhe as nuk kemi asnjë lidhje me dokrrat e segmentit politik e mediatik, që prodhon përditë baltë e helm në seanca parlamentare, shfaqje televizive e kanale digjitale, ku lloj-lloj pjellash të mendësisë së errët inkuizicionale, na bëjnë gjyqe si ato të komunizmit, duke u përpjekur të na fusin të tërëve në çdo trastë e thes korrupsioni që hapet nga SPAK-u!

• Ne jemi në këtë detyrë për të bërë Shqipërinë Europiane 2030 me reforma të vërteta, përpjekje të mëdha, vendosmëri absolute dhe me të gjitha forcat e ekzekutivit, gjyqësorit dhe legjislativit, ku punët janë të ndara e ku lavdi Zotit, popullit që e mbështeti fuqimisht hapjen e rrugës së Reformës në Drejtësi dhe Partisë Socialiste, e cila i hyri detit në këmbë për ta hapur këtë rrugë, tanimë s’jemi më vendi ku për 100 e kusur vite nuk u hetua e gjykua kurrë nga një drejtësi e pavarur, as edhe një person me pushtet politik a lidhje me të!

• Prandaj qentë le të lehin, Shqipëria do të shkojë përpara, me qeverinë e Partisë Socialiste që do të ecë vetëm përpara, me Drejtësinë e Re që duhet të vazhdojë vetëm përpara, pa i lënë kusur askujt që përdor flamujt e partive, majtas e djathtas, lart apo poshtë, për të nxjerrë përfitime të paligjshme për veten a të afërmit e vet, duke punuar për shtetin me një xhep të dukshëm për të ardhurat nga puna dhe me një xhep të fshehtë për paratë e marra me korrupsion.

Sondazh

Poll

Lexo gjithashtu

Hapësire reklamuese