Hapësire reklamuese

Aktualitet

Policia gjobit qindra shoferë të papërgjegjshëm, mbi 1,500 për parakalime të gabuara, telefon dhe shpejtësi

Shkruar nga Newsbomb
Policia gjobit qindra shoferë të papërgjegjshëm, mbi 1,500

Policia e Shtetit vijon fushatën për ndëshkimin e drejtuesve të automjeteve, një pjesë e madhe e të cilëve për shkelje të rënda si parakalime të rrezikshme dhe shpejtësi të lartë.

Gjatë 48 orëve të fundit, mbi 1500 shoferë janë gjobitur për disa shkelje, ndërsa 77 leje drejtimi janë pezulluar.

Njoftimi i plotë i Policisë:

Vijojnë kontrollet dhe monitorimi i qarkullimit të automjeteve, duke përdorur mjete të pauniformuara, kamera, radarë e alkooltestues.

Më qëllim parandalimin e aksidenteve rrugore, Njësia Operacionale e Drejtorisë së Policisë Rrugore, në bashkëpunim me Komisariatin e Policisë Rrugore në DVP Tiranë dhe me Sektorët e Policisë Rrugore në 11 Drejtoritë Vendore të Policisë, ka intensifikuar kontrollet, duke përdorur mjetet e pauniformuara, kamera të vendosura në automjete, radarë, alkooltestues dhe dronë, në të gjitha akset rrugore kombëtare dhe rrugë të tjera të evidentuara si njolla të zeza për shkak të ngjarjeve rrugore me pasoja të ndodhura më parë.

Gjatë 48 orëve të fundit, në të gjithë vendin janë arrestuar 13 drejtues mjetesh, 10 prej tyre për drejtim mjeti në gjendje të dehur, 2 për drejtim mjeti pa leje drejtimi dhe 1 për shkelje të rregullave të qarkullimit rrugor.

Janë pezulluar 77 leje drejtimi, nga të cilat 64 për shpejtësi mbi normat e lejuara dhe 13 për drejtim mjeti nën efektin e alkoolit.

Gjithashtu janë vendosur 2012 masa administrative për shkelje që janë burim për përfshirje në ngjarje rrugore, të ndara si më poshtë:

556 masa administrative për parakalime të gabuara

511 masa për përdorim të celularit gjatë drejtimit të automjetit.

419 masa për shpejtësi mbi normat e lejuara.

312 masa për mospërdorimin e rripit të sigurimit.

187 masa për mosvendosjen e kaskës mbrojtëse.

27 masa për shkelje të semaforit.

Policia Rrugore apelon për të gjithë përdoruesit e rrugës në tërësi, veçanërisht drejtuesit e mjeteve, motomjeteve dhe çiklistët, që të tregojnë kujdes dhe të respektojnë rregullat e qarkullimit rrugorsi dhe fton qytetarët që të denoncojnë në Komisariatin Dixhital dhe në numrin e emergjencave 112, çdo paligjshmëri. 

Sondazh

Poll

Lexo gjithashtu