Djali i biznesmenit të njohur në Kosovë, Naser Kelmendi është arrestuar. Mediat kosovare bëjnë me dije se Elvis Kelmendi është arrestuar nga Njësia Speciale e Bosnje dhe Hercegovinës, në një aksion të madh kundër krimit.
Mësohet se babai i Elvisit, biznesmeni nga Peja ishte i përfshirë në një sërë veprash kriminale bashkë me djemtë e tij.
Elvisi nuk është një emër i panjohur për policinë pasi në vitin 2010 ai ishte akuzuar për vrasje.
Ai ishte arrestua edhe në Beograd në vitin 2017 për dhunë në familje dhe armë pa leje. Elvisi u denoncua në polici nga e dashura e tij.
Bashkë me babain dhe dy vëllezërit e tij janë të përfshirë në listën e zezë të Shteteve të Bashkuara të Amerikës si trafikues ndërkombëtar të drogës.
Ai ishte në kërkim nga Policia e Kosovës, madje për këtë PK kishte kërkuar edhe ndihmën e qytetarëve për çdo informacion rreth vendndodhjes së tij.
Familja Kelmendi njihet për zotërim të madh të pasurisë, ata cilësohen si “bosët e drogës”, të kërkuar nga njësitet policore në disa vende të Ballkanit.