Një debat i ashpër virtual po zhvillohet mes ish-presidentit Bujar Nishani dhe profesor Romeo Gurakuqit, deputet i PD në Shkodër i dalë nga zgjedhjet e 2017.
Më herët Gurakuqi ka hedhur akuza ndaj komisionit të Vlerësimit të kandidatëve në PD, pasi këta të fundit vendosën për skualifikimin e tij nga gara.
Më tej ish-Presidenti Bujar Nishani i është përgjigjur Gurakuqit me fjalë fyese dhe ofenduese, madje i ka përmendur dhe dy dosje të sigurimit të shtetit.
Gurakuqi nuk ka vonuar të reagojë përmes një shënimi në rrjete sociale, teksa nxjerr dokumentin nga Autoriteti i Dosjeve dhe thotë se ato dy dosje të përmendura nga Bujar Nishani nuk kanë lidhje me të apo familjen e tij.
Ish-deputeti i PD sqaron se as ai as familja e tij nuk kanë qenë kurrë bashkëpunëtorë të Sigurimit apo anëtarë të PPSH-së. “Shpifësi do të mbajë përgjegjësi ligjore”, paralajmëron Gurakuqi.