Ka përfunduar pa asnjë incident vizita e Presidentit turk Erdogan në Shqipëri. Policia e shtetit me anë të një deklarate ka falenderuar qytetarët dhe drejtuesit e mjeteve për mirëkuptimin dhe zbatimin me korrektësi të udhëzimeve policore.
“Falë masave të shtuara, profesionalizmit të shërbimeve policore dhe të Gardës së Republikës, si dhe qytetarisë së treguar nga përdoruesit e rrugës, ka përfunduar pa asnjë incident, vizita e presidentit të Turqisë Recep Tayyip Erdogan.
Policia e Shtetit falënderon të gjithë drejtuesit e mjeteve dhe qytetarët, për mirëkuptimin dhe bashkëpunimin që treguan duke iu përgjigjur thirrjes së bërë nga Policia, dhe për zbatimin me korrektësi të udhëzimeve policore”, thuhet në deklaratën e Policisë.
Kujtojmë se prej orës 07:00 të mëngjesit të sotëm, një pjesë e madhe e rrugëve të kryeqytetit dhe zonave rreth Tiranës ishin të bllokuara për arsye sigurie. Tashmë akset janë hapur të gjitha, pasi Presidenti Erdogan është nisur drejt Turqisë.