Gjykata Themelore në Prishtinë ka dhënë vendimin e dënimit me 40 vite burg për katër personat e akuzuar për përdhunimin e 11 vjeçares në Prishtinë. Sipas gjykatës, i akuzuari E.R është dënuar me 15 vjet burgim, pasi është gjetur fajtor për veprën “dhunim”.
I mituri XH.S është dënuar me tetë vjet burgim për veprën penale “dhunim” dhe “keqpërdorim i fëmijëve në pornografi”.
Për të njëjtat akuza është shpallur fajtor edhe i mituri G.R dhe është dënuar me nëntë vite burg, ndërsa i mituri tjetër, G.J me tetë vite burgim.
Sakaq, gjykata tha se ka liruar nga vepra penale “shërbime seksuale të viktimës së trafikimit” të akuzuarin me inicialet SH.K.
“Gjykata nuk ka gjetur që e dëmtuara të ketë qenë e trafikuar apo viktimë e veprës penale të trafikimit me njerëz”, u tha në njoftim.
Rasti i dhunimit të 11-vjeçares u bë publik gushtin e vitit të kaluar, ku autoritetet thanë se ajo dyshohej se ishte përdhunuar në një park të Prishtinës. Po ashtu, e mitura dyshohet se ka qenë pre e dhunës seksuale edhe në qershor të vitit 2022. Për ngjarjen e qershorit, autoritetet kanë ngritur aktakuzë ndaj tetë personave.