Qytetarët shqiptarë nuk janë lejuar sot që të hyjnë në Kosovë nga pika doganore e Morinës në Kukës. Mësohet se shkak për këtë janë bërë masat e fundit të qeverisë së Kosovës, e cila vendosi dje se për të hyrë në vendin fqinj, duhen 3 doza të vaksinës anti-Covid. Ata thonë se janë njoftuar vonë për këtë vendim të qeverisë.
"Nuk e kemi ditur, në 10-11 të natës është dhënë vendimi. Sot jemi nis për Kosovë na kanë kthyer. Duan testin PCR 30 euro ose vaksinën e tretë, vaksina e tretë akoma nuk ka filluar në zonën tonë. Për hall po shkojmë jo për qejf”, thotë një qytetar.
"PCR 30 euro, nuk e kuptoj.Janë shtuar rastet tani”, shprehet një tjetër.
Ata thonë se qytetarët e Kosovës lejohen lehtësisht të futen në Shqipëri, ndërsa për ta kufiri është i mbyllur, ndaj sipas tyre duhet të vendoset kufiri edhe nga ana e autoriteteve shqiptare.
"Ta vëmë dhe ne kufirin siç na e kanë vënë ata ne. Duam një zgjidhje sa më shpejtë”, thonë qytetarët shqiptarë.
Kujtojmë se ditën e djeshme qeveria e Kosovës vendosi masa të reja për të parandaluar përhapjen e Covid-19 dhe varinateve të reja, pasi ditët e fundit janë regjistruar shifra rekord të infektimeve me koronavirus.