Pas përfundimit të procesit të numërimit të votave dhe publikimit të emrave të kandidatëve për kryetar bashkie nga radhët e Komisionit të Rithemelimit ka ardhur dhe reagimi i Partisë Demokratike.
Përmes një postimi në “Facebook”, Partia Demokratike “Primaret” e ish-kryeminisrit Sali Berisha i ka cilësuar si një proces ku i vetmi që emëron, voton dhe numëron është Berisha.
Sipas kësaj force politike kryeministri Edi Rama dhe Sali Berisha janë duke krijuar një parti të re për të dëmtuar Partinë Demokratike dhe për të mbajtur Shqipërinë në vendnumëro.
“Një proces ku Berisha emëron, Berisha voton, Berisha numëron, është vetëm vijimi i tollovisë së krijuar nga personi i shpallur non grata për korrupsion. As Berishën, as kandidatët e tij nuk i lidh asgjë me Partinë Demokratike.
Rama dhe Berisha po krijojnë një parti të re për të dëmtuar Partinë Demokratike dhe për ta mbajtur Shqipërinë në vendnumëro. Zgjedh Ramën, mban Berishën. Zgjedh Berishën, mban Ramën”, thuhet në deklaratë.