Ministri i Jashtëm serb, Ivica Daçiç, ka bërë një sërë takimesh në Amerikën Latine duke lobuar kundër njohjes së Kosovës nga këto shtete.
Pas vendeve afrikane, Beogradi po i kushton vëmendje vendeve të Amerikës Latine, pasi një numër shumë i madh i tyre nuk e kanë njohur ende pavarësinë Kosovës.
Ai ka theksuar se ka pasur biseda shumë të mira me zyrtarë argjentinas dhe se ‘Argjentina është dhe do të mbetet mike dhe përkrahëse e Serbisë’.
‘Mendoj se me këto vende duhet të kemi biseda serioze dhe atyre t’ua shpjegojmë gjithë situatën. Na është thënë qartë se kanë pasur rrezikun nga SHBA-ja, Gjermania e vende të tjera. Duke pasur parasysh marrëdhëniet tona tradicionale, mendoj se ato nuk do ta ndryshojnë qëndrimin’, ka thënë ministri i jashtëm serb Daçiç.
Daçiç po vazhdon me politikën e tij denigruese kundër pavarësisë së Kosovës dhe po shton lobimin e tij zyrtar në shtetet që e kanë njohur Kosovën për tërheqjen e këtyre njohjeve.
Këto veprime diplomatike të Beogradit po kalohen në heshtje nga Bashkimi Europian dhe nga përfaqësuesja e lartë e BE dhe negociatorja në dialogun Kosovë-Serbi, Federica Mogherini.