Për herë të parë pas 5 muajve kaos dhe tensionesh, Kuvendi i Shqipërisë pritet që këtë të enjte t’i kthehet normalitetit. Pas dakordësisë në tryezën e Konferencës së Kryetarëve mes opozitës së ish-kryeministrit Sali Berisha dhe Gazment Bardhit dhe mazhorancës, këtë të enjte pritet që seanca plenare të zhvillohet normalisht njëjtë si dhe para 5 muajve.
Pa skenare, pa bllokime dhe bilbila deputetët do të votojnë për ngritjen e dy komisioneve hetimore.
Kjo seancë do të ndiqet nga afër edhe nga diplomatët e huaj. Burime për mediat bëjnë me dije se në ambientet e Kuvendit, pak minuta para nisjes së kësaj seance plenare ka mbërritur ambasadori i Gjermanisë në vendin tonë, Karl Bergner, ai bullgarisë, Ivaylo Kirov si dhe zv.ambasadorja e Britanisë, Mia Marzouk.
Automjetet e zyrtareve para ambienteve te Kuvendit
Ndryshe nga sa jemi mësuar të shohim gjatë 5 muajve të fundit, ku deputetët e opozitës shkaktojnë zhurma dhe kaos në Parlament, duke se sot më në fund do të kemi “paqe” dhe seanca do të zhvillohet në kushte normale. Ne rendin e ditës janë ka disa çështje që do të diskutohen e më pas do të kalojnë për miratim. Po ajo që bie në sy është se po ashtu në këtë seancë do të votohet për ngritjen e Komisionit Hetimor në Kuvend për Shërbimin Publik të Sterilizimit dhe të Shërbimit Publik të Check-up në Shëndetësi dhe po ashtu për ngritjen e Komisionit Hetimor në Kuvend për Trajtimin e të Dhënave të Sistemit TIMS.
Kujtojmë që Kuvendi i kthehet normalitetit pas 5 muajsh, pasi PS dhe grupi i Rithemelimit ranë dakord për ngritjen e komisionit hetimor. Ditën e djeshme Partia Demokratike miratoi emrat e dy kryetarëve dhe anëtarëve që do të jenë pjesë e dy komisioneve hetimore në Kuvend, me objektiv të dakordësuar me mazhorancën për ndërhyrjet në sistemin TIMS dhe koncesionet në shëndetësi.
Politikani demokrat Ervin Salianji do të jetë kryetar i Komisionit Hetimor Parlamentar për ndërhyrjet që opozita i konsideron të paligjshme në sistemin TIMS, ndërsa anëtarë nga grupimi i tij do të jenë dhe shtatë deputetë të tjerë.
- Ervin Saljanji – kryetar i komisionit për TIMS;
- Lindita Metaliaj – anëtar;
- Lefter Gështenja – anëtar;
- Asllan Dogjani – anëtar;
- Ramadan Likaj – anëtar;
- Luan Baçi – anëtar;
- Elda Hoti – anëtar;
- Bledjon Nallbati/ Isuf Çelaj – anëtar zëvendësues.
Po ashtu, në mbledhjen e sotme të Grupit Parlamentar të Partisë Demokratike është dhënë dakordësia dhe për përbërjen e Komisionit Hetimor Parlamentar për koncesionet në fushën e shëndetësisë. Kryetare do të jetë deputetja Albana Vokshi, ndërsa anëtarë nga opozita do të jenë shtatë deputetë të tjerë.
- Albana Vokshi – kryetare e komisionit për shëndetësinë;
- Zheni Gjergji – anëtar;
- Ina Zhupa – anëtar;
- Edmond Spaho – anëtar;
- Sajmir Korreshi – anëtar;
- Xhelal Mziu – anëtar;
- Petrit Vasili – anëtar;
- Ilda Dhori/ Emilia Koliqi – anëtar zëvendësues.
Ndërkohë, anëtarët e tjerë në këto dy komisione për të cilat është arritur marrëveshje do të jenë nga mazhoranca socialiste. Propozimet do të depozitohen në Kuvendin e Shqipërisë dhe pritet që në vazhdim, dhe socialistët të bëjnë publik emrat e nënkryetarit dhe anëtarëve të komisioneve.