Norvegjia do të vendosë ushtrinë e saj në gatishmëri të lartë nga dita e martë. Kështu deklaroi sot kryeministri norvegjez, Jonas Gahr Stoere, teksa ky shtet po rrit sigurinë në përgjigje të luftës në Ukrainë.
Norvegjia tani është eksportuesja më e madhe e gazit natyror në Bashkimin Evropian, duke dërguar rreth çerekun e furnizimeve në BE, pasi Rusia ndaloi dërgesat.
“Kjo është situata më e rëndë e sigurisë në disa dekada. Nuk ka tregues se Rusia po zgjeron luftën e saj në shtetet e tjera, por rritja e tensioneve na bën ne më të ekspozuar ndaj kërcënimeve, operacioneve të inteligjencës dhe fushatave ndikuese”, u shpreh kryeministri norvegjez.
Ministri norvegjez i Mbrojtjes, Bjoern Arild Gram, deklaroi se forcat e armatosura norvegjeze do të kalojnë më shumë kohë në detyra operacionale sesa në stërvitje. Sipas tij garda e Brendshme që është një forcë e mobilizimit të shpejtë, do të ketë rol më aktiv.
Ndërkaq, forcat e armatosura norvegjeze kanë anuluar stërvitjet me Shtetet e Bashkuara me avionët luftarakë F35, duke preferuar që këta avionë të mbesin në Norvegji, bëri të ditur kreu i forcave të armatosura, gjenerali Eirik Kristoffersen.
“Ne presim që kjo situatë të zgjasë të paktën një vit”, tha Kristoffersen.