Kryetari i Kuvendit të Kosovës Glauk Konjufca, ka thënë sot se raportet shtetërore mes Kosovës dhe Serbisë janë shumë më të këqija sesa raportet Rusi-Ukrainë, prandaj shprehet se nisur nga kjo, asnjëherë s’duhet përjashtuar mundësia e një agresioni serb ndaj Republikës së Kosovës.
Kryeparlamentari i Kosovës shton se kur bëhet fjalë për Serbinë, duhet përgatitur për skenarin më të keq. Sipas tij, FSK-ja duhet të shtojë dhe rrisë nivelin e të drejtës për llojin e armatimit. Glauk Konjufca shprehet se kjo duhet bërë në partneritet me NATO-n.
“Kurrë s’duhet ta përjashtojmë mundësinë dhe potencialitetin e një agresioni serb mbi Republikën e Kosovës. Duke u nisur nga ky pretendim, nga ky postulat, për këtë arsye ne mendojmë që forcat e sigurisë së Kosovës duhet ta rrisin nivelin e të drejtës së tyre për llojin e armatimit.
Pra, Republika e Kosovës padyshim që duhet ta ketë edhe nivelin artilerik të ushtrisë së vet. Natyrisht, këto do t’i bëjmë në bashkëpunim të ngushtë me NATO-n. Në njëfarë mënyrë, ne duhet t’i bindim ata si partnerë, që Kosova ka nevojë për këtë gjë”, ka thënë Konjufca.