Sot u përmbyll misioni i skuadrës holandeze në “luftën” kundër zjarreve. Lajmi u bëhet me dije nga ministri i Mbrojtjes, Niko Peleshi, i cili falenderon BE, Holandën dhe Çekinë për mbështetjen e jashtëzakonshme në situatën e vështirë që kaloi vendi ynë.
“Sot u përmbyll operacioni i skuadrës holandeze në “luftën” kundër zjarreve, një situatë e vështirë që përjetoi vendi jonë gjatë muajit të fundit.Bashkimit Evropian na mundësoi nëpërmjet mekanizmave të tij një mbështetje të jashtëzakonshme!
U përballëm me një situatë kritike zjarresh për shkak të temperaturave shumë të larta. Sot mund të themi se këtë sfidë e përmbyllëm me sukses, pavarësisht se gatishmëria e forcave të mbrojtjes civile vazhdon të jetë e lartë. Faleminderit Bashkimit Evropian, Mbretërisë së Holandës dhe Republikës Çeke për ndihmën në helikopterë dhe trupa!”, shkruan Peleshi.
Në aktivitetin e organizuar në pjesën ushtarake të Aeroportit Ndërkombëtar “Nënë Tereza”, ishte i pranishëm edhe ambasadori i BE-së, Luigi Soreca, i cili gjithashtu falenderoi ekipet holandeze dhe çeke për ndihmën, për kontributin mjaft pozitiv që kanë dhënë për mbrojtjen e mjedisit në territorin e vendin tonë.
“Shumë faleminderit Holandës dhe Cekisë për helikopterët. BE kontribuoi në shpëtimin e jetës, jetesën dhe mbrojtjen e mjedisit të Shqipërisë. Gushti ka qenë një muaj i solidaritetit, për BE Holandë Ceki dhe Shqipëri! Edhe Shqipëria priti refugjatët afganë në nevojë. Për BE dhe Shqipërinë, solidariteti nuk është një fjalë boshe”, shkruan Soreca në Twitter.