Hapësire reklamuese

Çështjet kryesore

Politikë

Ministrja Kushi udhëzim për shkollat: Shkurtohen orët mësimore me 10 minuta, bashkitë duhet të pajisin URGJENT me ngrohje 28 shkolla

Shkruar nga Newsbomb
Ministrja Kushi udhëzim për shkollat: Shkurtohen orët
Ministrja e Arsimit Evis Kushi, njofton se për shkak të motit me temperaturat të ulta, në disa shkolla në zonat e Devollit dhe Dibrës është udhëzuar që orët mësimore të shkurtohen me nga 10 minuta. "[...] u kemi kërkuar bashkive të marrin masa për 51 shkolla ku ngrohja bëhet përmes sistemit elektrik por ngarkesa në rrjet ka sjellë vështirësi për ngrohjen optimale të tyre. Gjithashtu, i kemi informuar që të ndërhyjnë në 21 shkolla, ku sistemi i kaldajës ka nevojë për riparime apo furnizim me lëndë djegëse", njofton Kushi. Më tej, ministrja e Arsimit thotë se në kuadër të bashkëpunimit me institucionet e pushtetit vendor, është kërkuar në mënyrë urgjente të pajisen me sistem ngrohje 28 shkollave nga ana e bashkive respektive.

Reagimi i plotë i Evis Kushit, ministre e Arsimit:

Duke konsideruar prioritet absolut shëndetin dhe mirëqenien e nxënësve tanë, gjatë gjithë vitit, e veçanërisht gjatë kësaj periudhe me temperatura tepër të ulëta dhe me ngrica në disa zona malore të vendit, po e ndjekim me shumë kujdes situatën e shkollave në të gjithë territorin e vendit, përmes strukturave tona arsimore. Në komunikim të vazhdueshëm me çdo bashki dhe njësi administrative në vend, kemi kërkuar marrjen e masave në kohë, sigurimin e ngrohjes dhe garantimin e kushteve për zhvillimin e procesit normal mësimor, si pjesë e përgjegjësisë së tyre. Përsa i takon situatës në terren dhe raportimeve në mënyrë të vazhdueshme nga zyrat arsimore, kemi kërkuar në mënyrë urgjente pajisjen me sistem ngrohjeje të 28 shkollave nga ana e bashkive respektive. Ngrohja e institucioneve arsimore bëhet në disa mënyra: ngrohje qendrore me kaldajë, kondicionerë, ngrohës me energji elektrike, si dhe sobë me dru ose pelet. Duke vlerësuar këtë përpjekje të përbashkët me institucionet e pushtetit vendor dhe institucione të tjera, u kemi kërkuar bashkive të marrin masa për 51 shkolla ku ngrohja bëhet përmes sistemit elektrik por ngarkesa në rrjet ka sjellë vështirësi për ngrohjen optimale të tyre. Gjithashtu, i kemi informuar që të ndërhyjnë në 21 shkolla, ku sistemi i kaldajës ka nevojë për riparime apo furnizim me lëndë djegëse. Në disa shkolla të zyrave arsimore Dibër dhe Devoll, ku temperaturat janë tepër të ulëta, orët e mësimit janë reduktuar me 10 minuta. Për sa i përket menaxhimit të përbashkët të situatës, vijojmë takimet konstruktive dhe komunikimet e vazhdueshme me kryetarët e bashkive, për t'i falënderuar për bashkëpunimin dhe për t'i kërkuar vëmendje të shtuar në këto ditë të ftohta.

Sondazh

Poll

Lexo gjithashtu

Hapësire reklamuese