Presidenti Ilir Meta thotë se ka pritur në zyrë Ambasadorin e Japonisë në Tiranë, Makoto Ito, me rastin e përfundimit të misionit të tij në Shqipëri.
“Prita sot në një takim të përzemërt Ambasadorin e Japonisë, Sh.T.Z Makoto Ito, me rastin e përfundimit të misionit të tij në Shqipëri.
Shpreha mirënjohje për vëmendjen që Japonia i ka kushtuar forcimit të marrëdhënieve me vendin tonë, për mbështetjen e vyer teknike e financiare të dhënë ndër vite, si dhe e përgëzova për rolin e kontributin e Tij në këtë drejtim, veçanërisht për promovimin e Shqipërisë”, shkruan Meta.
Më tej, Presidenti thotë se e ka falenderuar ambasadorin për ndihmën e Japonisë për ndihmën pas tërmetit të 26 nëntorit.
“Falenderime të veçanta, shpreha gjithashtu, për ndihmën bujare të Qeverisë së Japonisë në adresimin e pasojave të tërmetit të nëntorit të kaluar, si dhe për përballimin e pandemisë COVID-19.
Përcolla përshëndetjet dhe falenderimet për Perandorin Naruhito dhe për Qeverinë japoneze”, përmbyll Presidenti.