Ermir Vuksani, një 44 vjeçar me banim në Lezhë, është arrestuar nga Policia në hyrje të Portit të Durrësit. Ky shtetas, referuar njoftimit zyrtar, është arrestuar me armë zjarri në çantë, si dhe me sasi municioni luftarak.
"Shërbimet e Portit të Durrësit, në bashkëpunim me Policinë e Durrësit dhe me autoritetet doganore të këtij Porti, si rezultat i kontrolleve intensive në hyrje/dalje ndaj shtetasve dhe mjeteve të transportit me të cilat ata udhëtojnë, me qëllim parandalimin, evidentimin dhe goditjen e paligjshmërive në kufi, kanë finalizuar operacionin policor të koduar “Parandalimi”, si rezultat i të cilit u arrestua në flagrancë shtetasi:
-Ermir Vuksani, 44 vjeç, banues në Lezhë, për veprën penale “Trafikimi i armëve dhe i municionit”.
Gjatë kontrollit të ushtruar në çantën e 44-vjeçarit, shërbimet e Policisë gjetën dhe sekuestruan në cilësinë e provës materiale, një armë zjarri pistoletë, një mjet prerës (thikë) dhe një sasi municioni luftarak, të cilat, i arrestuari dyshohet se do t’i trafikonte drejt vendit tonë", njofton Policia e Durrësit.
Materialet i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme.