Gjatë mbledhjes së Komisionit të Ekonomisë dhe Financave ditën e sotme u diskutua mbi dekretin e Presidentit për kthimin në Kuvend të ligjit për menaxhimin e Parkut Kombëtar të Butrinit.
Ishte përfaqësuesi ligjor i Presidentit, Bledar Dervishaj, ai i cili i kërkoi parlamentit ta pranojë dekretin e Presidentit, ose të ngrejë një Komisin të Posaçëm Parlamentar në lidhje me këtë çështje, për shkak dhe të interesit të lartë publik.
Pasi mazhoranca rrëzoi dekretin e Presidentit, Meta ka reaguar nëpërmjet një statusi në Facebook. Ai ka listuar të gjitha arsyet ligjore për kthimin e dekretit për rishqyrtim në Kuvend, teksa i ka bërë thirrje dhe depuetëve që ti lexojnë ato.
Postimi i plotë:
MBRONI PARKUN E BUTRINTIT DHE VLERAT E TRASHËGIMISË HISTORIKE DHE KULTURORE KOMBËTARE!
I ftoj deputetët e Kuvendit të Shqipërisë të lexojnë me shumë vëmendje të gjitha arsyet ligjore të prezantuara edhe sot në Komisionin e Ekonomisë nga Këshilltari im Ligjor, z.Bledar Dervishaj lidhur me Dekretin për kthimin për rishqyrtim në Kuvend, të Marrëveshjes për Administrimin e Parkut të Butrintit, që:
📌 – cenon dispozita konkrete të Kushtetutës dhe parimet kushtetuese të shtetit të së drejtës;
📌 – cenon parimet dhe vlerat universale që mbrohen që në preambulën e Kushtetutës, duke cenuar kësisoj drejtpërdrejtë interesin publik shqiptar;
📌 – cenon Konventën e Parisit dhe nuk është në harmoni me parimet e mbrojtura nga UNESCO;
📌 – bie ndesh me jurisprudencën e Gjykatës Kushtetuese;
📌 – praktika e ndjekur nga ekzekutivi dhe Kuvendi i Shqipërisë, rezulton se nuk ka realizuar dhe nuk ka siguruar mendimin e ekspertizës së pavarur vendase që ka njohuri të thelluara mbi Parkun Kombëtar të Butrintit, nënzonave dhe siteve arkeologjike të tij;
📌 – procedura e ndjekur nuk ka garantuar një proces të gjerë e të thelluar të konsultimit me publikun, duke sjellë kështu një produkt jo cilësor dhe një debat publik mbi këtë çështje;
📌 – shmang auditimin përmes institucioneve të pavarura kushtetuese të veprimtarisë ekonomike-financiare lidhur me të ardhurat që do të krijohen dhe mënyrën e përdorimit të tyre;
📌 – për shkak të mungesës së konsultimit gjithëpërfshirës, ky ligj është produkt i një procesi që ka shkelur Rezolutën e datës 19 maj 2022, të miratuar nga Parlamentit Europian.
I kujtoj shumicës në Kuvendin e Shqipërisë se nëse do të zgjedhë të rrëzojë politikisht Dekretin e Presidentit dhe të vijojë me hyrjen në fuqi të ligjit, kjo nuk do t’i shërbente aspak interesave të larta të vendit dhe kombit shqiptar, por do të përkeqësonte çdo marrëdhënie të organeve të shtetit me shoqërinë civile, ekspertët, dhe qytetarët në tërësi.