Ish shefi ekzekutiv i kompanisë farmaceutike Martin Shkreli thotë se ka disa “anë të mira” në jetën e burgut dhe se ai është përfshirë në “edukimin” e të dënuarve të tjerë.
Në një letër që Shkrei ia dërgon shoqes së tij Lisa Whisnant, shqiptaro-amerikan i rrëfen se “gjërat nuk janë aq të këqija” pas hekurave.
“Ka disa gjëra të mira. Unë po u mësoj këtyre të burgosurve gjëra të reja dhe shpresëplotë për disa rrugë që mund t’ua ndryshojnë jetën”, shkruan ai në letrën që Whisnant e ndau me New York Post.
Shkreli ndodhet pas hekurave prej shtatorit kur një gjykatës në Gjykatën Federale të Bruklinit vendosi ta dënojë për mesazhin që ai kishte postuar në rrjetet sociale ku ofronte 5 mijë dollarë për këdo që do arrinte të shkulte një fije nga flokët e Hillary Clinton.
Shkreli kërkoi falje nëse kishte nxitur “akte dhune apo çfarëdo qoftë” duke thënë se ishte vetëm një shaka ndaj ish kandidates për presidente, raporton newsbomb.al.
Ish CEO i Turing Pharmaceuticals u bë i famshëm pasi rriti çmimin e barnës për pacientët me AIDS me 5,000%.