Kryeministrja franceze Elisabeth Borne ka njoftuar se qeveria heq dorë të paraqesë reformën e pensioneve për votim në Asamblenë Kombëtare dhe do i drejtohet nenit 49.3, teksa opozita protestonte dhe thërriste "Dorëheqje, dorëheqje".
Kjo do të thotë se reforma supozohet se është miratuar, nëse nuk votohet një mocion nga shumica e deputetëve, gjë që do të shkaktonte rënien e qeverisë.
Deputetët kanë 24 orë kohë për të paraqitur mocionin, i cili ndoshta do të votohet të hënën e ardhshme, më 20 mars dhe do të nevojiten 289 vota për t'u miratuar. Sipas deklaratave të fundit, janë tre mocione në përgatitje; një i paraqitur nga koalicioni i majtë dhe ekologjik Nupes, një nga Kuvendi kombëtar dhe një nga një grup partish të vogla.
Mijëra demonstrues po demonstrojnë në Place de la Concorde, mijëra të tjerë po shkojnë drejt Asamblesë Kombëtare për të protestuar kundër vendimit të qeverisë, i cili deri dje dukej i përjashtuar.
Mekanizmi i nenit 49.3 është krejtësisht legjitim dhe është përdorur tashmë nëntë herë në këtë legjislaturë dhe dhjetëra herë në të kaluarën. Por problemi është politik; një reformë që ka shumë rëndësi për Macronin dhe qeverinë, ka provokuar tetë ditë marshime dhe greva dhe është gjykuar e padrejtë si nga opozita e djathtë ashtu edhe nga e majta.