Deputeti i LSI-së, Luan Rama, sulmon ambasadorin e OSBE-së në Shqipëri duke e quajtur si ushtar të Gramoz Ruçit.
Ai thotë se mbledhja e parë e Komisionit për Reformën Zgjedhore është një hap pozitiv, ndërsa shton se Shqipëria dhe shqiptarët meritojnë zgjedhje të lira e të ndershme.
Në postimin e tij në rrjetin social “Facebook”, Luan Rama sulmon dhe ambasadorin e OSBE në Shqipëri, pasi e quan ushtar të Ruçit.
“Shqipëria meriton zgjedhje sipas standardeve të OSBE/OHDIR-it, pavarësisht se në mbledhjen e parë ambasadori i OSBE-së u shfaq si ushtar i Gramozit!”, shkuan ndër të tjera deputeti i LSI-së.
Postimi i Plotë:
Sot u mblodh për herë të parë komisioni parlamentar për reformën zgjedhore!
Le të shpresojmë që më në fund do të realizohet një reformë reale, që zgjedhjet të garantojnë integritetin dhe barazinë e votës dhe që banditët të mos jenë më as pjesë, as prapavijë dhe as pararojë e politikës!
Shqipëria meriton zgjedhje sipas standardeve të OSBE/ODHIR-it, pavarësisht se në mbledhjen e parë, ambasadori i OSBE-së u shfaq si ushtar i Gramozit! Për ta harruar atë skenë groteske, po rilexoj këtë fundjavë “Ushtarin e mirë Zhvejk”.