Presidenti i Serbisë, Aleksandër Vuçiç, ka reaguar pas rezultateve të zgjedhjeve të jashtëzakonshme në komunat në veri të Kosovës.
Në Mitrovicën e Veriut, në garën për kryetar ka fituar Goran Rakiç nga Lista Serbe. E njëjta parti ka fituar edhe në Zubin Potok, Leposaviq e në Zveçan. Lista Serbe i ka fituar zgjedhjet bindshëm në të gjitha komunat, duke marrë mbi 95 për qind të votave në secilën.
Ndërkohë, Vuçiç e ka përshëndetur dhe falënderuar popullin serb për daljen masive në këto zgjedhje.
“Njerëzit tonë kanë dëshmuar energji jashtëzakonisht të madhe dhe dëshirën se duan të luftojnë për të ardhmen e tyre dhe një të nesërme më të mirë për fëmijët e tyre”, është shprehur ai.
"Me këtë fitore nuk do t’i zgjidhim të gjitha problemet tona, por kemi treguar se duam unitet në zgjidhjen e këtyre problemeve dhe zgjidhjen e përbashkët të tyre.
“Mendoj se pas të gjitha kërcënimeve nga shqiptarët dhe disa serbë, ky është konfirmimi më i mirë për unitetin politik të luftës për interesat tona vitale dhe nacionale dhe interesat tona më të rëndësishme shtetërore”, ka deklaruar ai.