Sekretari i Përgjithshëm i PS, Damian Gjiknuri i ka konsideruar tymnaja lajmet se ish-drejtori i FBI i arrestuar në Amerikë është ndikuar nga autoritetet shqiptare. Në një konferencë për mediat, numri dy i socialistëve u shpreh se drejtësia amerikane e ka zbardhur çështjen.
Këtë të mërkurë, Damian Gjiknuri tha se Partia Socialiste do të dorëzonte sot në SPAK një tjetër kallëzim për ngjarjet e 21 Janarit 2011. Ai kërkoi që Prokuroria Speciale të hetojë zinxhirin komandues dhe komunikimet në radio të Lulzim Bashës me Ndrea Prendin, në atë kohë komandant i Gardë.
“Kjo është një tymnajë e ngritur nga opozita shqiptare për të sfumuar këto ngjarje dhe faktet e reja që kanë dalë për 21 Janarin. Gjithmonë ngrihet një alibi që gjoja ka më tepër rëndësi se vrasja e qytetarëve të pafajshëm. Drejtësia amerikane e ka zbardhur atë çështje.
Ngjarjet e Shqipërisë, ato që përmenden, nuk faktojnë përfshirje të autoriteteve shqiptare. Përsa i përket asaj të Nik Muzin, rasti i Muzin i është nënshtruar drejtësisë amerikane dhe askush nuk e ka hedhur poshtë që paratë kanë qenë ruse. Ka një vendim të drejtësisë amerikane, janë zbardhur dhe dokumentet.
Në vetëvete, problemi ka të bëjë me sa drejtë e ka zbatuar detyrën një zyrtarë i lartë i SHBA. Nuk ka faj kryeministri i Shqipërisë se ka takuar një zyrtar të lartë të FBI. Çdo politikan do e bënte. Nuk ka lidhje me Shqipërinë, por është cënuar interesi i SHBA”, u shpreh Damian Gjiknuri.
I akuzuar në dy çështje të veçanta penale në Nju Jork dhe Uashington, ish-drejtori i Kundërzbulimit në FBI Charles McGonigal, dyshohet se ka marrë pagesa nga oligarku rus Oleg Deripaska në mënyrë ta largonte atë nga lista e sanksioneve dhe, në rastin tjetër, të ketë marrë pagesa nga një agjent shqiptar, për të hapur një hetim penal për një shtetas të Shteteve të Bashkuara.